馬會近來轉播越洋賽事，地區有英國、法國、日本、紐西蘭、澳洲、新加坡、杜拜、韓國、南非及澳門，除咗希望多啲類型賽事刺激馬迷投注，一直亦想透過越洋賽事擴闊馬迷眼界，認識多啲唔同國家地區嘅賽馬文化，呢個出發點係正面嘅，事實上坐喺屋企就睇到世界頂尖騎練雲集嘅一級賽，即使一蚊都無參與投注，亦係有好高觀賞價值嘅娛樂。唔少馬迷睇越洋賽事，好自然會同香港賽事作出比較，有時會發覺香港馬會都幾本事，好多海外地區嘅賽事水平同規模，根本同本地賽事差幾條街。當然有時亦會發覺人哋有啲地方做得比香港好，更加會奇怪香港馬會喺國際上咁有地位，依然改善唔到呢啲有漏弊。馬會上周轉播日本秋華賞錦標七場賽事，令人最深印象嘅係日本處理馬匹入閘嘅效率，場場拉馬入閘都非常之乾淨俐落，相信馬迷對馬會處理馬匹入閘嘅流程都有切身感受，好多時因為攪唔掂一匹馬，累到成棚馬喺閘廂內罰企，繼而引發其他馬發脾氣或慢閘嘅個案多不勝數，唔只馬迷有怨言，亦經常聽到有馬主及倉主投訴。好多人覺得司閘助理員經常喺入閘前放慢手腳，係馬會借意拖長時間吸引多啲投注，呢個講法其實唔多合理，拖延入閘幾分鐘實際唔會收多好多投注，要投注嘅馬迷亦會睇時間以免買唔切。與其話司閘助理特登拖慢，不如承認現時嘅馬匹入閘程序仲有改善空間。
騎師是運動員，狀態也會有高低起伏，上季莫雷拉做主帥受到制肘，到了今季回復全勇，以前的雷神回歸，單看今季贏好幾匹過往一直不能出頭的馬匹便可作證。相反地，上季冠軍潘頓今季手風欠順，錯失亦比前多，正正是有點像上季的莫雷拉，坐騎每每被頂在外疊，內側銅牆鐵壁，多好的功架都無法取到遮擋位，這際遇問題與騎功或戰意無關，看慣跑馬的就知道職業運動員也有順流逆流，何況賽馬這麼一個講求能力，也得講求多少運氣的競賽。潘頓向來都係話題王，最新一單當然係潘頓亂跑輸完嘅「忠心勇士」，換咗宿敵雷神輕鬆收復前失，自己卻係騎住「遨遊戰士」虎頭蛇尾大熱倒灶，再講多樣數據俾大家知，原來潘頓大熱唔入前兩名嘅馬，再出換人成日都反彈，今季有邊幾隻？數俾大家聽，「明月昇輝」潘頓輸到無雷公咁遠後，今季開鑼換貝力斯即勝、「蟲草之星」又係熱死後改用何澤堯贏到，另外「志在四方」上季尾大熱跑梗頸四後，由沈拿操刀建功，當然唔少得剛周日的「忠心勇士」成功補中喇，其他尚有「載譽歸來」在潘頓胯下做完電兔，今季復出入Q，「路路之星」及「依斯堅」亦都有第二交代，近十隻潘頓大熱失Q馬換人，係錄得四冠三亞，原來好多馬唔一定要冠軍先舞得掂，而且經佢調教後，威力仲勁，潘頓二攤堅係唔怕執。