今季最冷門馬，暫時仲係由潘明輝所爆嘅「英明神駒」，獨贏賠率每十蚊派一千七百六十三蚊，點解爆得咁杰撻撻，皆因嗰日跑濕泥地，「英明神駒」冇乜泥地根據情況下，加上排個十三檔，唔少馬迷當佢冇到下爆出，而連帶該場排十四檔嘅「龍之星」亦入Q腳，連贏位兩隻冷馬串埋，派近萬四蚊咁滯，事後睇番，十三及十四檔馬能夠串Q，除非呢兩隻馬係非常好泥地性能嘅馬，否則能有如此賽果，應該與場地偏差有關，所以呢場戰績可唔可以作為再捧呢兩隻馬嘅依據，大家都係要落足心機去拆解。
今次日賽，呢兩隻馬又再碰頭，可否再有表現是難以猜估，或者牠們真的是泥戰高手亦唔定，如果真係，再跑一條翻版Q出來並不奇怪，不過，同場出自羅富全馬房的「兵貴神速」（圖2號），上場曾與這兩駒同場，跑得一席第七名，輸俾頭馬不足七個身位，假如賽事在正常泥地下進行，說不定「兵貴神速」才是真命天子，可以反先前兩駒。因為從「兵貴神速」今季的部署來看，馬房依然安排牠目標鎖定跑泥地一哩，放棄下周三夜賽的三班一哩及千八米，幾可肯定這駒幕後是有信心，認為這駒跑泥地一哩必有能力取勝，否則倉主若求穩陣計，正頭正路安排「兵貴神速」報戰下周三曾經贏過的兩項谷草賽程。其實，這駒跑谷草的能力是不俗的，谷草千八米贏「管之星」，至於一哩途程，強如「活力勇士」亦要蹄下稱臣，眼見這駒今季兩戰泥地一哩，表現尚非突出，但練馬師的堅持深信有他的見解。又或者這駒是匹慢熱馬的關係，季初的兩場作戰狀態仍非最佳水準，這次是牠季內的第三仗，狀態也從早前兩場熱身賽中跑起了，大家想吼半冷門的話，這匹質新持續進步的中長途馬，不妨作為推敲對象。