馬會是一家非牟利公司，而非私人機構，所有收入在支付派彩、獎金、經營費用及稅項後，餘下的款項均悉數撥捐慈善及社區計劃，相信多好人都知，好多馬迷都經常自嘲，輸咗錢鋪草皮都係做善事，個心都會舒服好多，撇除每年以十億元計嘅撥款，其實馬會亦係政府以外嘅其中一個最大僱主，長年僱用大量兼職僱員，當中包括大學生、家庭主婦及部份中年人士，靠馬會份兼職收入幫補生計。香港今年經濟下行已經擺喺面前，市道唔好，好似飲食、零售同旅遊等行業都好大鑊，有啲僱主為咗縮皮，甚至要員工自己放無薪假，打工仔就只有硬食。過去呢幾個月，馬會場外投注站暫停開放或提早閂門已經成為常態，總之預知邊區有公眾活動，就要關閉當區投注站，馬迷雖然無咁方便，都仲有其他方法去落注，但係投注站嘅兼職員工就較為頭痕，因為佢哋收入係以時薪計，投注站關門無工開，佢哋就無收入，而呢個情況唔知仲會持續幾耐。馬會總裁應家柏向來心水清，佢當然明白兼職員工因投注站停業，收入少咗一大截，佢無賴三賴四將責任推俾人，反而較為實際，諗吓可以做乜嘢幫到啲兼職員工。據知佢已經要求馬會嘅行政部門，睇吓點樣調配啲受暫停營業影響嘅兼職員工，去其他能夠維持服務嘅投注站返工，盡量減低對佢哋收入嘅影響。應家柏做到行政總裁，大可以對兼職員工嘅問題闊佬懶理。而一個大機構嘅最高管理層敢於承擔，確實值得一讚。
另一方面，現時在澳門發展，土產港將何華麟，周日將重臨沙田馬場，夥拍澳門打吡冠軍「聖靈之都」，出戰國際三級賽莎莎婦女銀袋，挑戰「時時精綵」及「馬克羅斯」等本地頂尖長途賽駒。「聖靈之都」在港獲評一○二分，須與評一○九分的「添滿意」，同負最低造磅一一三磅，不過由於何華麟需超兩磅上陣，因此反而須讓田泰安策騎的「添滿意」兩磅。究竟兩地打吡冠軍實力相差多遠，周日將有分曉。何華麟對上兩次來港出戰港澳盃，同日均獲得不少其他坐騎，前年更曾為姐夫羅富全贏得「遨遊神駒」，攜手闖入凱旋門。何華麟周日來港亦有其他坐騎，並將策騎羅富全的「三生好運」。「三生好運」紐西蘭五歲自購新馬，暫時仍未出賽，但賽前兩次試大閘在莫雷拉胯下均有好走勢，操足而來，不排除可一鳴驚人。