有時睇馬房用人，便知馬匹戰意如何，例如今次日賽兩匹實力馬「錶之銳」及「精簡最好」，馬房用回最佳贏馬配搭，必定搏老命，輸咗一件事，點解咁樣講。「錶之銳」今季四度上陣，三次由何澤堯上陣，得兩冠一亞，但其中一仗用蔡明紹跑，咁就三甲不入。另外一隻「精簡最好」，情況亦相似，季內跑過四場，三場用利敬國全勝，但其中一場用牌仔陳嘉熙，貪減十磅咁就中伏。其實，有些馬匹，只要用上一些大師傅跑，便知道幕後的心意，正如今次列陣三班千四米的「威進駒」（圖1號），今季跑四場，三仗用楊明綸，另一仗用黎海榮，全部輸晒而回，正是幕後所求，因為馬房正替這駒部署減分，由季內最高的八十四分，減回現時的七十九分，並可以重新回到三班上陣，今次三班列陣，大家睇睇鞍上人是何人，便是潘頓，這駒三班跑千四米是威力十足的一駒，尤其是配一流大師傅上陣，過往在三班總共跑過七場千四米，除首兩仗分別用史卓豐及何澤堯未入三甲外，其餘五仗用超級大師傅跑都是坐二望一，莫雷拉騎一次贏一次，潘頓也是騎一次贏一次，莫雅騎一次得亞軍，蘇兆輝騎兩次亦全跑得亞軍。所以大家只要睇睇「威進駒」用人，便知今次列陣幕後是抱甚度態度。
再睇「威進駒」埋門的備戰過程，潘頓近兩個禮拜來，包括最後試跑這課，前後所有快試，總共有四課，均是由潘頓親自包辦，尤其是本周二試課細草閘，「威進駒」潘頓拍「福喜多多」助手，後者今季三出三捷，狀態經已夠弗，但拍上「威進駒」，後者亦是相形見拙。當然，「威進駒」假假哋都上過二班，相反「福喜多多」今季才從五班反彈，不過點講都好，今次列陣的「威進駒」，狀態對晒辦，大家不妨細心研究吓，有分頭值得一捧。