■鄧健泓做導演搞喊石詠莉。香港文匯報訊 石詠莉 ( Sukie ) 本月初宣佈與唱片公司星娛樂和平解約，Sukie 在獨立後的第一擊，就係推出微電影《 DREAMS COME TRUE 》，由老公鄧健泓 ( Patrick ) 擔任導演，並參與編劇、監製、剪接等創作及製作，此作品已參加由香港互動市務商會主辦的第七屆微電影「創 + 作」支援計劃 ( 音樂篇 )，與專業組的其他九部微電影一同競賽，角逐多個獎項。
Patrick過往曾操刀拍過幾個有故事性的MV，但今次是首度拍攝微電影，他覺得整個過程都有得着，雖則已是N次夫妻檔合作，但 Patrick 對太太依然十分欣賞，他說：「每次同老婆合作都好得心應手，因為我太了解佢，佢又好專業，呢次有場撞車戲拍通頂，嗰晚拍落雨又凍又趕時間，Sukie要濕身，成頭血漿，又瞓地，佢冇怨言，工作態度好好；同埋今次好多謝Don ( 李日朗 ) 幫手，老婆成日話要搵個靚仔做主角，相信呢次佢好滿意。」
Partick 在拍攝期間亦試過整喊老婆，Patrick說：「入面有一場戲喺洗衣舖拍，嗰日我好大聲同Sukie講『唔好掂枱上啲嘢』，佢就覺得我好惡，當場就喊，停咗機 6 分鐘等佢......當然之後我要道歉啦。」
片中 Sukie 飾演一對孖生姊妹，一人分飾家姐「阿瑩」同細妹「Christy」，兩個角色的性格及態度有明顯分別，最搞笑係有朋友及fans看過微電影後，以為Sukie真係有個孖生妹妹，仲讚「妹妹」比較靚，令 Patrick 兩公婆啼笑皆非。