「輸打贏要」係「黃絲」嘅典型寫照，佢哋最叻就係鬧住人嚟攞着數。話說近日唔少國家為防疫「鎖國」，但有啲唔識死嘅「黃絲」就繼續去旅行，結果梗係滯留當地返唔到嚟。一名被困秘魯嘅「黃絲」吳小姐連日嚟喺facebook開post呻被隔離嘅生活慘過坐監，有香港媒體好心報道佢嘅情況，點知吳小姐就扮清高話自己只接受過「黃報」《蘋果日報》嘅訪問，大鬧無綫電視（TVB）冇經授權就轉載佢啲資料，激到無綫公開大家嘅對話記錄，證明吳小姐「擘大眼講大話」。網民見到都話睇到慣，形容係「黃絲」嘅一貫作風，連「黃營」自己友都話今次幫唔落啦！
特區政府上月呼籲市民停止外遊，不過，吳小姐堅持去秘魯旅行，仲好自豪咁喺當地景點展示有「港獨」標語嘅旗幟，等到秘魯「鎖國」嗰陣先識驚，仲即刻打畀香港入境處求助，但對方建議佢搵當地中國大使館幫手，結果佢就「黃絲」病發，話自己唔會一邊鬧中國，一邊對住「貓哭老鼠」嘅中國大使館求助，仲話自己寧願滯留秘魯都唔會搭包機走喎。
有網民踢爆話吳接受媒體訪問嘅時候，明明話想入境處提供金錢支援，但𠵱家就誓神劈願話唔需要「中國幫手」。吳睇完相當唔服氣，話有啲媒體亂咁吹風，製造佢要求包機嘅假象，又「澄清」冇授權過無綫任何訪問同取材，叫大家「睇少啲TVB罷啦」。
無綫其後喺新聞節目公開同吳嘅對話記錄，清楚見到吳話只要註明出處就可以使用，而無綫亦對吳嘅講法深表遺憾。證據擺在眼前，吳終於「跪低」，話自己「一時搞錯」，「唔記得」有畀轉載權無綫，所以同大家講聲Sorry喎。
「黃營」網民：影衰「黃絲」
有「黃營」網民都話睇唔過眼，「Hei Dogdog」話：「本來都撐你，但真係撐唔落一個冇誠信既（嘅）人，對你好失望。」
「Janice Li」仲話：「大話精，影衰『黃絲』。」
「David Pong Chun Plu」：「有啲嘢唔係道歉左（咗）就可以搞掂，你影響緊嘅唔係你一個人嘅事。」■香港文匯報記者 鄭治祖