■馬國明（左）為劇集《BB大晒》開工。香港文匯報訊 （記者 梁靜儀）馬國明、吳岱融、吳業坤及劉溫馨昨日於將軍澳電視城為劇集《BB大晒》開工，劇中飾演新手爸爸的馬國明推住BB車拍攝。
馬國明表示與小演員合作非常考驗耐性：「我以前都有幫手湊過兩個姨甥，但已隔咗十幾年，將來如果有小朋友可能要加倍付出耐性，今次戲中我同岑麗香（香香）有個兩歲女，佢已經算乖，我哋同佢混熟咗，仲經常抱佢玩凌空飛天，好似舉啞鈴咁，但有時對住真BB真係搞唔掂，佢哋拍到攰就扭計要瞓，唔可以拍多少少至停，導演就會先調拍其他場口，好似打游擊咁。」
問到他可有想過何時當爸爸？他笑說：「我都唔知，到呢個階段都呃唔到大家，（閃婚？）隨緣啦，要睇有冇遇到合適對象，之前睇過家燕姐既訪問，話有朋友拍拖十年分手，有朋友拍拖一年就結婚，以前我嘅觀念係拍拖要相處一段時間至結婚，但𠵱家就有改變，會睇夾唔夾。」