早前被「黃絲」捧至神壇嘅「黃店」龍門冰室連日被曾經合作者接連爆出醜聞，間舖老闆「人血張」張俊傑日前喺facebook發表避重就輕「心聲與回應」，回應有關佢呃錢嘅指控，但對有人話佢有老婆仔女、女朋友仲媾女「手足」嘅風流韻事，同埋有人話佢係黑社會，佢隻字未否認。被佢反咬嘅前「義工家長」就放話要開Live三口六面講清楚，等緊「人血張」回覆。
批張報大數屈呃「學費」
有自稱龍門冰室前員工此前喺facebook爆料，話「人血張」搵「手足」笨。「人血張」日前開post回應，但就對呢啲指控閉口唔提，只係講啲與前合作者直接嘅是是非非。
巨大篇幅中大部分回應嘅事件係關於佢之前合作嘅「義工家長」「Charlotte」及「Sandra」。「人血張」話呢兩位係主動聯繫佢，要求龍門出資、承擔虧損合作做生意，不果後離開。佢又話出錢支援「Charlotte」及「Sandra」介紹嘅「手足」，而嗰兩位仲要求佢資助「學生」以「每小時$2,000學習saxophone」，但就唔畀佢求證是否真有其人，佢拒絕咗呢啲要求，話裡話外講到呢兩個人好似有呃錢企圖。
網民質疑無否認醜聞
不過，好快有人出post反駁，話張俊傑全部做嘅生意，都係客人落晒order龍門收晒現金後，先至按量出貨嘅，仲有成班義工免費幫手，根本冇乜情況之下會蝕錢，又po出聊天記錄，證明根本冇叫佢負責虧損。根據po出嘅錄音，資助「手足」學Saxophone係一個月2,000蚊，同「人血張」所講嘅「每小時$2,000」就好唔同。
「Sun Leu」就話佢篇文「謊話連篇雜亂無章」，話佢冇否認自己同partner雄哥係黑社會、冇否認自己叫阿忠恐嚇陳聲、冇否認自己包二奶兼扮單身媾女「手足」，揶揄佢「只准人血張 × 二奶媾女手足，不許小手足拖手仔做手工藝」。
「Charlotte」都回應叫佢唔好再龜縮，話「全部高登訪問中嘅手足、美甲義務導師Fanny、手足廚房老細Sara、人西谷故事中嘅『手足』A、B同小『手足』C、『義工家長』們，聯合邀請你出嚟當面對質。由你挑選一位『黃色區議員』，大家一齊上區議員辦事處，開live三口六面講清楚。請『良心』腦細回應！」 ■香港文匯報記者 文根茂