學黃碧雲「睇協調」犯眾憎 「黃絲」批輸打贏要食相核突
人類總是要犯同樣的錯誤，講緊嘅就係以「本土派」自居嘅馮達浚。話說攬炒派心郁郁想喺下屆立法會九龍西選舉豪取4席，所以規定「初選」頭4名先可以披甲，而想參選九西嘅馮達浚喺公布電子點票結果時排第四，原本有望以末席資格出線，點知大台喺點完兩萬幾張紙本票後，佢竟然戲劇性咁俾民協嘅何啟明反超前120票。突然冇咗博一博就可以拎10萬元議員月薪嘅機會，馮達浚點會甘心？咪唯有學晒同區低票落敗嘅民主黨黃碧雲咁，死撐話能否出選係睇最終協調結果，結果梗係同黃碧雲嘅下場一樣，俾人鬧反口覆舌兼逼到「跪低」囉。■香港文匯報記者 鄭治祖
根據攬炒派組織「民主動力」嘅資料，九龍西「初選」名單有9張，雖然現時仲未決定出選名單嘅數目，但目標係爭取4個議席，而目前得票首4位依次為岑子杰、張崑陽、毛孟靜同何啟明，可以肯定攬炒派最終會派呢4人報名參選立法會。
馮達浚「澄清聲明」愈描愈黑
有網媒日前報道話，馮達浚即使排第五都依然會參選立法會，引嚟「黃絲」群起圍攻，而馮達浚亦就此喺facebook發咗篇愈描愈黑嘅「澄清聲明」：「根據協定機制，九龍西是以『初選、民調』雙軌進行協調，而初選出線隊伍數目亦是待『初選』協調會議後決定。結果公布後我深受一眾『抗爭派』朋友所鼓舞，固然希望有機會與戰友一起行下去。縱使如此，我馮達浚承諾一切將以協調會議結果為準，最終參選意向將待協調結果公布後再定奪。」其實一句講晒，咪即係唔肯認輸囉。
同區嘅參選人黃碧雲日前亦喺拉票時講過類似嘅說話，結果被「同路人」同「黃絲」圍攻到「跪低」棄選，馮達浚今次有前車不鑒，下場當然一模一樣，最終唯有喺噚晚開記者會，公開「跪低」認衰棄選。
事後，馮達浚仲寫咗篇千字文「祝福」成功「出線」嘅「同路人」，但篇文就充滿酸味，大呻自己嘅選舉團隊「一開始只有兩個人、廿支直幡、八個易拉架、缺乏物資、缺乏人力、沒有大黨支援，只有極少量地區莊（樁）腳」，唔知網民又點睇呢？
當日鬧一嚿雲 𠵱家唔認衰
「Alex Lam」一嚟就理性分析：「馮達浚係咪應該反躬自省，諗諗點解拎唔到人票」。「Jack Wong」就長話短說：「請接受結果，唔好輸打贏要」。「Tracy Kwok」就踩多一腳：「馮達浚團隊而（𠵱）家都唔知自己衰乜呀？錯就錯在你地（哋）當日×一嚿雲（黃碧雲）大大力，而（𠵱）家回力鏢又唔肯認衰仔，仲要怪人冇睇機制？當日一嚿雲講機制你地（哋）有冇幫佢澄清過呀？冇呀，你地（哋）係大大力×呀，輸打贏要食相核突到呢！」
劉頴匡疑為馮達浚護航
另一區參選人、同「港獨」組織關係密切嘅劉頴匡就疑似為馮達浚護航：「九東目標贏三席，但第四第五位都可以照報名參選。無人覺得有問題嗎？」結果即刻被「Jack Garou」質疑：「問題係合約精神，如果何啟明無反超你會出聲？」「Gerard Ng」就話：「咁你唔×去問大妖（戴妖）？」
嗰頭講起戴妖，佢呢頭就喺facebook話，正式選舉日前兩周會開始民調，並會喺投票前幾日公布結果，到時參選團隊需跟民調停止選舉工程。咦？咁講法，唔知係咪暗示緊黃碧雲同馮達浚一直講自己要睇完民調先決定是否參選嘅講法係啱，只係最後被班「本土派」逼到提前「跪低」呢？ ■香港文匯報記者 鄭治祖
網民鬧爆馮達浚
「Alex Lam」：「馮達浚係咪應該反躬自省，諗諗點解拎唔到人票」。
「Jack Wong」就長話短說：「請接受結果，唔好輸打贏要」。
「Tracy Kwok」：「馮達浚團隊而（𠵱）家都唔知自己衰乜呀？錯就錯在你地（哋）當日×一嚿雲（黃碧雲）大大力，而（𠵱）家回力鏢又唔肯認衰仔，仲要怪人冇睇機制？當日一嚿雲講機制你地（哋）有冇幫佢澄清過呀？冇呀，你地（哋）係大大力×呀，輸打贏要食相核突到呢！」