佢哋揮一揮衣袖，就帶走一堆個人資料，講緊嘅就係負責籌辦攬炒派「初選」嘅戴妖（戴耀廷）同「民主動力」召集人趙家賢囉。話說雷聲大、雨點小嘅「初選」終於落幕，下階段應該係協調、民調同配票，但繼區諾軒學成縮骨功、宣布退出「初選」工作之後，連戴妖同趙家賢都「滿師出關」，由得班「出線」嘅攬炒分子自生自滅。不過原本諗住輕輕地走嘅�哋就俾一堆網民質疑淆底，兼叫佢哋交代投票者個人資料嘅下落。
早前一直死撐「初選」合法嘅區諾軒，前日突然話「合法參與政治活動」係佢嘅極限，為咗保障自己安全同向身邊人負責，唯有退出「初選」工作，結果俾網民鬧爆淆底無義氣，扔低戴妖等一班「手足」。
點知噚日戴妖扮晒「功成身退」，喺facebook話「作為民主派35+『初選』的協調者，到了這階段，餘下需要做的已不多」，又話自己好累，所以要喺「未來一段日子爭取多一些休息時間，也可以更專注於學術的工作」。
趙家賢同日亦宣布：「本人擔任召集人的『民主動力』獲主導『民主派』協調工作的戴耀廷副教授及區諾軒前議員委託承辦『初選』，最終結果已公布......經慎重考慮各方意見......本人現宣布（布）退出參與本屆立法會選舉的協調工作」。
其實講嚟講去咪就係淆底，知道搞咗個唔合法嘅「初選」又唔想負責，咪搵個靚啲嘅落台階囉。呢啲都係人之常情，但唔知網民又點睇呢？
網民：拎晒個人資料又唔交代
「KM Rita Ch」就替大家憂慮：「你和民研團隊有責任保護好選民資料的保密安全和不被外洩，請問打算如何處理結果提早外洩，和之前你地（哋）說過投票系統或被監控的問題？不能不了了之！」「Hamlet Chiu」就一齊「追數」：「吓，拎晒我哋啲個人資料又唔交代處理成點？有晒身份證號碼同簽發日期，你拎去賣都大把錢啦！我哋點算？」
「Yun Hui」就氣憤難平：「縮完一個又一個，之前又話不分化不割席？呃晒啲人出嚟投就諗住走佬？」「JOE joe Joe」就質疑「初選」認受性：「之前又話為咗35+又『初選』又協調又民調又乜又物，搞完個『初選』就走晒，留班參選嘅自己嘈交搞掂？你點確保到佢哋會跟機制？如果今日係咁你當初就咪搞『初選』啦！」■香港文匯報記者 鄭治祖