■有「黃絲」網民以為便利店收銀員打錯單會影響《蘋果》收益，「扮正義」要求對方改單。 Debby Chan fb截圖為咗博同情，成班攬炒派不斷渲染所謂「政治打壓」，更做埋啲小動作嚟加強「說服力」。有「黃絲」就喺網上散播謠言，話喺便利店「7．11」（七仔）買《蘋果》，收銀員會自動打單做另一份日報個名，結果佢「親身」實測仲話「證實」係堅，講到有「勢力」喺度故意㩒低《蘋果》嘅銷量咁，同時將收據影上facebook提醒大家一定要留意七仔員工嘅打單，結果被網民嘲笑唔識背後機制同搞着七仔員工，又批評佢哋連買份報紙都要搞批鬥，係搵着啲打工仔嚟搞。
自從警方日前以涉嫌勾結外國或者境外勢力危害國家安全罪拘捕壹傳媒集團創辦人黎智英，同搜查《蘋果日報》編輯部後，一群平時唔買報紙，甚至連《蘋果》網上版都可能冇訂閱嘅「黃絲」就忽然「文青化」，落街買份《蘋果》然後影相擺上社交媒體呃Like。不過，所謂「爆賣」只係攬炒派大手掃貨再免費派造成嘅假象。《蘋果》印數由當日55萬大減到噚日16萬份，成街都仲剩返一疊疊，就知只係人為虛火。
冇得再渲染「市民支持賣到斷市」，攬炒派就轉移視線，搞吓「被迫害」嘅把戲囉！網民「Debby Chan」就喺「黃絲」fb群組「西環變幻時」發帖，話有人喺七仔買《蘋果》，結果張單顯示咗另一份報紙，佢於是喺噚日去七仔買《蘋果》時，真係見到收銀機嘅貨品欄顯示咗另一份報紙個名，於是即刻叫收銀員改單，仲自以為是好似發現新大陸咁post上fb「提醒」大家。
報社收益不變 原兼職：用腦啦
唔少喺七仔做過兼職嘅網民就忍唔住為收銀員「平反」。自稱喺七仔做咗7年嘅「HY lam」就話：「報社係有回紙機制，各報社會委託車隊收返報紙檔同便利店前一日賣唔晒嘅報紙，根據回紙數向分銷商退返訂紙時畀嘅錢，所以便店利收銀員點打單都唔影響報社最終收益，而且報紙檔都冇收銀機啦，唔通佢將賣晒《蘋果》啲錢畀晒另一間報社咩？講之前用個腦諗吓好難？」
「Kax Yum」就呼籲要體諒吓「黃絲」嘅「苦衷」：「依（??）家黃絲既（嘅）精神狀態唔太健康，有種被迫害妄想（症）， 社會邊有咁多玩針對，至緊要嗱嗱聲做晒d野（嘢）收工，你估收銀（員）好得閒？邊做野（嘢）仲要諗點迫害『黃絲』」
「KK Tsang」就叫班「黃絲」體諒吓員工：「如果麵包舖全部麵包都賣5蚊，你買菠蘿包但收銀員打咗雞尾包，你會否會煩住佢叫佢改？個個好似你咁啲七仔員工成日喺度改單唔洗（使）做啦！到時排長龍你又話人打單得慢！」
「Cecilia Chau」就非常火滾：「買份報紙都要批鬥？其實7仔屬於怡和集團旗下嘅牛奶公司，即係你班『黃絲』話要杯葛嘅『藍店』，鍾意分得咁清楚就咪去7仔買嘢！最好繳費同八達通增值都咪鬼去??呀！」
「黃絲」咁小器被人鬧完點會甘心？一堆網民向《蘋果》發短訊，獲《蘋果》回覆話：「已向管理團隊反映情況，目前正向7-Eleven方面了解及跟進，謝謝告知」喎。
■香港文匯報
記者 雨航