■有「連登」網民發現，《蘋果》日前刊登的廣告，來自其曾獨家報道踢爆經營手法的不良組織。 fb截圖《蘋果日報》為斂財，可以將道德底線降到幾低？睇怕條線已經隱咗形！因經營不善令旗下刊物不斷縮水嘅壹傳媒集團創辦人黎智英，早前告急呼籲讀者資助，成功引嚟一班唔介意燒錢嘅「黃營」公司落廣告支持，但有心水清嘅網民發現，前日喺《蘋果》登咗一版廣告嘅香港中小型業主會，就曾經被《蘋果》質疑係教人借貸炒滙豐同劏房，結果搞到人血本無歸嘅組織，令「黃絲」網民不禁慨嘆，經常聲稱捍衛新聞自由同道德嘅《蘋果》，原來最重要都係「在商言商」，為咗錢不惜幫被自己踢爆過嘅無良組織宣傳。
昔「獨家踢爆」 今「在商言商」
滙豐控股（0005）今年4月1日公布停派第四季股息，至今年底前亦不會派息及回購，其股價受消息拖累大挫。大批受影響散戶組成聯盟抗議。其中，香港中小型業主會創辦人呂宇健（Ken Sir）牽頭成立「滙豐小股權權益大聯盟」，但有業主會中人報料畀《蘋果》，話Ken Sir以所謂「loop loop loop大法」借私貸及銀行透支額度投資高息滙豐，點知滙控煞停派息令到呢個「loop」（循環）中斷，惹起學員不滿，所以向Ken Sir施壓，要求佢成立聯盟抗議並追討損失。
《蘋果》就喺4月7日刊登題為《【獨家】踢爆滙豐維權組織真面目 劏房「業主會」教人借私貸炒燶滙豐》嘅報道，引述報料人話Ken Sir開班教人借大筆私貸買滙控製造息差，點知當時滙控股價大跌又唔派息，令「學生」「輸到好甘」云云。
事隔短短4個月，走到窮途末路嘅黎智英已經唔介意落廣告嘅客人咩來歷，只要有錢就乜都肯。網民「閉月羞花落雁」就喺網上討論區「連登」發帖幫大家重溫：「呢班人就係之前《蘋果》爆教人滙豐收息班×街……呢班×街絕對唔係『同路人』，佢哋只係一班老千，同傳銷冇分別。」
「正一泛登仔」就話：「好傷心，估唔到《蘋果》會接呢單廣告，還我新聞道德」「ohmyholyfood」就要求大家「集氣」：「要搵多啲真『黃絲』撐《蘋果》先得，如果唔係要硬食呢啲廣告。」 ■香港文匯報記者 鄭治祖