■馬詩慧思想開通，不介意女兒性取向。香港文匯報訊 （記者 梁靜儀）名模馬詩慧與王敏德所生的大女王曼喜（Kayla），日前透過社交平台宣布與任職攝影師的同性伴侶Elaine訂婚，前晚馬詩慧到九龍灣出席一個模特兒比賽時，被問到女兒何時舉行婚禮，她笑言自己也是被通知，故不知兩人何時舉行婚禮，相信要待疫情緩和才決定。
馬詩慧又指女兒已長大成人，毋需事先通知她，因為以前自己也不會，她亦好替女兒開心，都好支持她們。問到老公王敏德是否都一樣感到高興？她說：「老公反應當然好開心，佢冇話唔接受，最重要仔女鍾意，呢個世界咁大，搵到一個鍾意自己又對自己好嘅人機會好低，都祝福佢哋快樂生活，（放心將女兒交給Elaine？）女兒好成熟，相信個女嘅判斷。（傳授「夫妻」相處之道？）唔需要，每個人性格同相處方式都唔同，Kayla有問題會同我哋分享。」至於她又會否跟足傳統送金器給Kayla？她笑說：「既然佢哋咁唔傳統，我咪同樣玩法，唔使咁傳統。」 說到她的二女王麗嘉經常呻無拖拍，馬詩慧稱只是緣分未到而已，有些人遲遇到，亦有人早遇到，不用擔心。
穿上低胸裝現身的蔡宛珊，透露有份投票選出最佳體態及最上鏡兩個大獎。問到評分標準？她說：「我本身都鍾意運動，審美眼光女仔唔只要瘦，仲要有肌肉，男仔就要大隻同身形好；最上鏡就行出來要有自信，五官端正，眼大同笑容甜美，咁會吸引啲。」
問到工作，她表示第三波疫情爆發前都接到一些工作，但因限聚令關係要擱置或改期，所以都希望疫情盡快過去。她謂現時主力拍劇及做綜藝節目，之前就同Ronny（Mr.成員黎澤恩）一齊拍《熟女強人》，對方飾演她的老公，題材講交換Partner，但最後唔成事。談到張沛樂近日在節目中自爆拍戲時被男對手「抽水」，問到她可有遇過類似事件？她說：「冇，我啲男對手好好，我哋私下係好朋友，大家都鍾意健身，又會幫對方拍網上短片。」
Mr.成員黎澤恩（Ronny）笑言覺得《熟女強人》中換妻一集題材大膽，認為超越了道德界線，他說：「我揣摩唔到，要靠睇戲去揣摩角色。（接受唔到？）我連女朋友都未有，呢啲行為有啲過分， 聽到都打冷戰同毛管戙。」
談到隊友布志綸（Alan）指吳業坤的新歌《原始心態》跟他們的舊歌《森林》相似，Ronny解釋說：「我有聽過首歌， Alan唔係咁嘅意思，佢唔係話個旋律好似，只係後面個和弦似，唔可以話相似就係抄襲，咁講對吳業坤好唔公平，佢哋成個團隊花好多時間去做音樂，佢個班底我都認識，佢哋做音樂好認真，我哋都試過俾人講，對我哋都唔公平。」