■靚湯擔任珠寶店的開幕嘉賓。香港文匯報訊 （記者 李思穎）湯洛雯（靚湯）和馬國明（馬明）自今年6月認戀後，兩人不時放閃晒恩愛，近日更傳出他們「閃婚」消息，靚湯昨日現身時否認「閃婚」一事，但就大方透露互相有對方住戶大廈的住戶卡和密碼方便上樓，雖然依然「守住」入屋鎖匙，靚湯一臉甜蜜表示已視馬明是結婚對象，叫大家不要搵她來玩！
靚湯為翡翠飾品品牌分店擔任剪綵嘉賓，戴上品牌的翡翠手鏈和耳環，她拍畢無綫新劇《一笑渡凡間》後，已休息兩個月，這段時間便積極修身，略見成效，她表示：「拍劇時天氣太熱，不時吃甜品補充體力，我一吃甜便很易肥，雖然沒有上磅習慣，穿衣時明顯發覺身形脹了，現時衣服變回合身，（馬明鍾意你肥定瘦？）他沒所謂，通常答案都一樣，兩樣都好。」
對於傳出「閃婚」，靚湯肯定說：「當然不會，我們絕對是有計劃的人，之前做訪問話閃婚只是講笑，點都要計劃將來，起碼父母要知同買屋，但暫未有結婚打算，先要儲錢，當然兩個人拍拖必然會討論過結婚的事，完全沒提也是騙人，（視馬明是結婚對象？）都係，我幾多歲呀！仲玩吓先咩，唔玩啦，大家唔好搵我嚟玩。」
有指馬明擁有女友屋苑住戶證，靚湯爽直說：「畀咗張後備卡佢，有時我忙着便不用下樓接佢，住戶證是進入大廈，家中門口都要我開門，（不索性給他大門鎖匙？）阿媽會鬧，（那你有馬明住所大廈密碼嗎？）有呀，大廈密碼都唔畀我就好過分，但同樣沒有他的門匙，哈哈。」
靚湯續指父母沒有「催婚」，爸爸對男友印象是正常：「暗地裏應該會想我對象再有進步空間，而現在都覺得好好，父母都好喜歡馬明，媽咪更經常鬧我『恰』他，又說我房間不整齊，要多給馬明煮食，其實我同馬明對食的要求不高，但媽媽不喜歡我們經常叫外賣吃，所以自己為馬明都多了落廚，對上一次煮『洋葱炒牛肉』，他讚我廚藝好我就相信，自己以前在英國租屋住，會同室友輪流煮飯，對烹飪有少少底子。」
靚湯獲翡翠品牌送贈一套特製獨角獸翡翠手鐲，另有馬仔袖口鈕則轉贈馬明。問到馬明有否送她飾物，她甜笑道：「送過手鐲，（馬明送的手鈪有特別紀念日子？）唔講，是秘密，送禮物無睇是否紀念日，適合便會送，馬明好sweet，有時我經過見到喜歡的，輕輕講過一下，他便會記住，然後在特別日子送給我，（咁細心嫁得過？）送禮物就話嫁得過咩？細心都好，同佢拍拖都係結婚為主。」