第一場、第五班、一八○○米。「家家勝意」雖然上季跑咗十三場全敗，但季尾開始已有接近走勢，尤其最後兩仗跑長途，分別輸三個半馬位及兩個零馬位，似乎偏長路程較合發揮。睇番鄭俊偉上季十九場頭馬當中，千八米或以上佔七匹，引證佢練中長途馬比較拿手。「家家勝意」今季於五班起步，以其上季於四班都有接交走勢，落五班跑應該好有用，實屬馬房爭分棋子。
第四場、第三班、一六五○米。「喜盈寶」出自日本種馬「龍王」，其母是「大震撼」女兒，兩線血統顯赫，服役時曾在岩田康誠胯下贏千六米。「喜盈寶」在澳洲時已屬目前馬主名下，當地曾贏千四及於千六米上名，未來性能肯定是匹千八或以上馬匹；上次在港初出路短兼檔差可作熱身，開氣後今次匆匆加程一哩有搏殺手影，隨時可一步到位。
第八場、第二班、一二○○米。大摩散倉加盟韋達的「好運」，上季三捷有餘未盡，升上二班仍未止境，可以捧場。「好運」以往曾多次跑泥地而與頭馬無緣，到三月泥地千二米取勝後主攻泥賽。五月初角逐泥地一哩配波健士取得泥地第二W，季尾再爭同程以無敵姿態增添進帳，在好泥下造出一分三十八秒七，水準極高，賽後被重加十分升上二班頗獲重視。「好運」投入韋廄後暑後立即展開操練，看來韋達省招牌心切隨時郁手。