今晚谷草安排八草賽事，以最窄C加三欄C加六彎作賽，頭場晚上七時十五分開跑，全晚並無設立錦標賽場合。練馬師方面，方嘉柏及羅富全均派出多匹實力馬參戰，可留意臨場動向。騎師方面，雷神、潘頓、田泰安及波健士都手執不少惡馬，不妨作為扶手棍看待。
第一場、第五班、一八○○米。「東方雷」何廄質新中長途分子，去季尾增程至千八米並採取前領策略，末段維持走勢，最終負個多馬位得季席，實力居於五班應有微利；上仗初出縮爭一哩，前段騎者放得過急，轉入直路乏力負五馬位，今次匆匆轉戰千八，官仔馬省過一仗開氣，應可走入前列。
第二場、第四班、一二○○米。「駿爵士」上季在谷草一千開糊，小方見牠慢腳，接戰就安排增程千二，排外檔起步蝕位極多，最後只輸半個馬位入Q；今季初出此程，起步快閘跟前冇後大敗一仗，今賽加配綁脷帶隨時打翻身仗。
第三場、第四班、一○○○米。「南區寶」上季四月尾嘗試回師谷草一千終試出彩虹，在滂沱大雨下先貼欄競跑，終賺取慢步速贏馬；翌仗馬兒克服多負七磅及排劣檔等不利因素下僅負馬頸得第三，再出原庄人馬搶放影贏「駿爵士」，打後兩戰有飛之下亦跑得接近；今次轉投羅廄初出，如能及早放出當有拚勝之力。
第四場、第三班、一六五○米。「發財福星」去季第三次列陣已於田草千四上名，之後配潘頓勝出新馬錦標補中，可見質素不俗；馬兒於季中小休，到五月六日復出跑谷草一哩，雖然場地陌生兼負重磅，但仍可輕取再出贏馬的「醉醒神」，足見場地性能超卓；在暑期重新訓練後，埋門試大閘走勢對辦，且看可否一出即有佳作。
第五場、第四班、一八○○米。「御風超影」上季轉丁廄出賽唔多，卻依然取得頭馬，仲要第一次跑谷草千八即贏，之後再於谷草一哩上名，頭三段一分十六秒二步速好快，能夠跟前貫注到底並非等閒。暑期此駒在從化受訓，例課無缺兼試埋大閘，對於一匹體弱兼細細隻的馬來說絕對係好事。可惜上周三初出谷草一哩，孭重磅全程快開，轉入直路當然散晒只跑第九，今次七日後練者匆匆入紙轉攻千八，小心換個跑法施回馬槍。
第六場、第四班、一六五○米。「鵲橋飛渡」去季因為健康問題上陣偏少，但每逢出賽都跑得近，在三月不良於行退出，休息一個月後在五七六場次復出，跑一哩負於頭馬「長友之星」個半馬位，能和「普仁」和「甲烷」兩匹質新馬輸近，一再證明本身擅長休後復出；暑假轉到賢廄後上了從化操練，眼見朝氣重現，結果上回一出在波健士胯下放到，今仗續爭此程值得再捧場。
第七場、第三班、一二○○米。「精彩勇士」上季出道由大摩訓練，遲至五月尾才作首戰跑田草千二，已能在郭能胯下僅輸個多馬位得殿軍；之後再上陣三次，僅轉戰谷草一千輸到脫節外，其餘兩仗在沙田俱入三甲，按其時年僅三歲兼欠缺出賽經驗論，今季身在三班中游起步定不愁寂寞。希斯回歸後接手訓練此駒，交足功課一出即索，今次轉戰窄場短途對手非強，可坐位望贏。
第八場、第二班、一二○○米。「加州雷電」上季三歲已經屢次在陣上克服重磅或劣檔贏馬及上名，例如七月中馬季煞科一役，倘非負一三二磅排在十一檔，並且讓十五磅予「維港奔流」，相信經已輕勝而回。今季此駒踏入四歲，狀態早臨，結果首戰發揮出色贏馬，今次升班列陣最合適的途程，同場對手不算太強，跑出水準的話，誠屬爭勝實力分子。