受到疫情影響，今季騎師陣容轉變不大，上季臨危受命來港嘅波健士、賀銘年分別取得半季及全季騎師牌照；最明顯的轉變就係巴度取得全季牌照，長駐香港發展。騎師選擇多咗，其他騎師想爭取實力坐騎更添難度，上周三谷草賽事，兩位見習騎師黃俊、陳嘉熙更未能獲得坐騎，但其實馬迷細心留意的話，便能一一拆解箇中原因。第一，截至目前為止，每位騎師陣上決定相當小心，冇乜騎師被罰停賽。第二，環顧今季賽事，潘頓、莫雷拉及田泰安三雄鼎足，幕後選擇騎師時，考慮因素眾多，有得揀的話梗係想揀晒前列騎師。第三，季初階段唔多馬需要借用見習生減磅優惠，減磅優勢未必係幕後首要考慮，加上見習生出賽經驗比大師傅少，一啲不易駕馭嘅坐騎，未必會起用見習生。希望過多一排，呢個局面會有所改善。
「川河」系馬主何家駒先生今年成功買位，可以參與總獎金達一千五百萬澳元嘅千二米短途賽珠穆朗瑪峰錦標，而呢場全球獎金最高嘅草地賽事，將於十月十七日喺蘭域馬場舉行，何生決定讓名下愛駒「川河達駒」參戰。被視為珠穆朗瑪峰錦標嘅重要熱身賽，途程千一米二級賽索士錦標，上周六喺蘭域馬場上演，「川河達駒」亦在陣中，並交由麥維凱策騎，入直路交出強勁加速力，幾步過晒對手，贏馬姿態非常誇張。值得一提，「川河達駒」今年兩戰全勝，馬匹進步良多，睇嚟馬主何家駒眼光果然好，有機會憑呢隻馬捧走珠穆朗瑪峰錦標。
九屆愛爾蘭冠軍騎師施慕齡，前年掛靴後一直與癌病搏鬥，近月病情惡化，過去數星期已經入院接受觀察，延至上周傍晚於都柏林的一所醫院與世長辭，終年四十三歲。一八年三月廿六日，施慕齡正式對外公布確診胰臟癌，其後以健康為理由掛靴。施慕齡策騎生涯最後成就，當然是夥拍衛爾德訓練之「夏辛村」，囊括一六年英愛打吡雙料冠軍，而在該年年底，更以愛爾蘭冠軍騎師身份來港出席國際騎師錦標賽，這也是其生前最後一次來港策騎。