「黃谷」包庇叫「刀下留人」 陳恒鑌嘆缺國教青年易學歪
黑暴分子成日造謠、講大話嚟造文宣，部分年輕人都有樣學樣，一出事就屈返對方轉頭嚟自保。近日網上瘋傳一條短片，有一名少年踩單車撞到人後俾街坊圍，佢一路都好寸兼無悔意，直到街坊話叫少年嘅父母嚟傾，佢就一秒跪低叫對方放過自己，見冇效就開始哭鬧話街坊打人，明明一直有人用手機影住，佢都可以大大聲一秒變臉講大話，只為求即時甩身，咁嘅心態都咪話令人唔心寒。
■香港文匯報記者 黃書蘭
條片開頭就影住個喺屋苑踩單車撞到人嘅少年俾幾個街坊截停，被撞傷嘅女事主話：「你撞到我好痛，紅晒！」個少年毫無悔意咁話：「畀錢你囉！」事主聽到之後好嬲咁話：「淨係你有（錢）呀，（𠵱）家撞到人對唔住都唔講聲。」
另一位男街坊都話：「呢度唔畀踩單車。」個少年就反駁：「有寫咩呢道（度）！」事主就叫佢：「唔好扮嘢，你第一日住呢道（度）呀？」少年就再好寸咁話：「係呀，我今日第一日住呢道（度），我租嘅！」有另一位女街坊都睇唔過眼開聲：「我喺你後面，睇住你架車完全無減速，係咁撞過去。」事主亦話：「我隻手紅晒呀，（𠵱）家我要投訴。」少年就即時喺事主面前撥頭髮話：「畀個頭你掃吖！」
事主見個少年咁樣，就叫個少年叫屋企人落嚟。喺呢個時候，一直好寸嘅少年突然跪低不停用雙手大力拍打地下，又以哭腔話：「我跪你啦！求吓你唔好搵我屋企人。」之後又跪喺度指住事主重複大嗌：「佢打我呀！」
見到個少年惡人先告狀，仲反屈事主打人，唔少網民都話佢唔啱。
「完美演繹講大話老屈易過食生菜」
民建聯立法會議員陳恒鑌都喺facebook對個少年「一秒變臉」感到驚訝，話佢：「完美演繹講大話老屈易過食生菜。」佢慨嘆︰「一個人的個人人格修養好重要，但欠缺國民教育的地方，好多年青（輕）人都漸漸忘卻了五育觀。」
不過，亦有「黃絲」繼續包庇。「黃谷」「將軍澳主場」谷主「Ringo NG」就發帖話：「畀阿婆捉住鬧佢踩單車個（嗰）位肥仔（少年）......有位街坊report（報告），估計係佢老豆（竇），成家人都好『黃』......各位批鬥×，刀下留人。」
網民嘆香港教育已死
好多網民就認為此風不可長。「Yo yo Cheung」話：「又拎『黃』出黎（嚟）做擋箭牌？」「GinyGiny Giny」都話：「谷主加咗黃藍落去，令件事再複雜咗。」
「Bdq Cammy」就話：「咪係囉，板主（谷主）做乜無啦啦又扯上黃藍呢......小朋友做錯事，用心教就可以啦！」
有網民就覺得少年嘅價值觀有問題，家長教師都有責任。「鄧笑娟」咁講：「三部曲：一先惡，二是左右言語，三是老屈。香港D（啲）教育已死，小朋友已習以為常，可能家中所有都係，太慘不忍睹......香港以後末（未）來靠呢班就可悲。」「Siu Kui Ng」則補充：「四部曲，首部（曲）話『畀錢人囉』以為有錢就可，價值觀有問題。」