申報92.5萬形象設計開支 網民嘲：同之前有乜分別？
形象呢家嘢真係好抽象，有時多條頭髮都可能好唔同，不過如果用幾十萬公帑搞啲咁嘅嘢，真係唔知市民點諗嘞。話說報名參選超級區議會功能界別嘅元朗區議員王百羽，被傳媒發現佢向選舉事務處申報嘅開支中，竟然用咗92.5萬喺形象設計方面，網民睇完真係眼都凸埋，仲擔心緊自己係咪要驗眼，事關佢哋真係睇唔出用咗咁多錢「裝身」嘅王百羽同之前到底有乜分別。■香港文匯報記者 雨航
有熱心網民就幫大家搵咗王百羽2016年同2020年嘅大頭相出嚟，等大家對比吓有咩唔同，仲揶揄：「當中，形象指導費75萬元。等等，請問洗（使）左（咗）系（喺）？」
講到呢度，我哋就要先還王百羽一個公道，事關我哋日前查過王百羽嘅選舉開支，佢喺個人形象花費嗰92.5萬有5個細項，分別係佔咗27.5萬嘅視覺形象設計費、10萬嘅形象指導費、5萬化妝費、25萬攝影及短片製作費，仲有25萬嘅講稿撰寫費，如果扣除撰稿費，王百羽應該只係使咗67.5萬「裝身」。
陸頌雄fb揶揄「開支之謎」
不過，67.5萬呢筆數都唔少，究竟佢同4年前有咩分別呢？網民「Larm Blue」就話：「原來形象指導建議啲頭髮由撥左邊， 變左（咗）撥去右邊，就值咁多錢」「Matt Man」就留意到王百羽換咗眼鏡：「副眼鏡應該都好貴」「Kwok Shuk Yi」就話：「減了少少肥？」工聯會立法會陸頌雄亦喺facebook開post揶揄：「『開支之謎』，75萬元搞形象指導......我究竟見到啲乜？」
不過更令人驚訝嘅係，王百羽同九龍城區議員李軒朗合組嘅名單總開支係489萬，但喺「黃絲」嘅社交群組就冇乜人提，似乎刻意掩飾緊「同路人」係大花筒嘅事實。
專頁爆王僅「撈油水」
fb專頁「無神論者的巴別塔」就形容呢單係最好笑，但冇「黃絲」敢提嘅新聞，事關王百羽呢位「本土派」參選人，原來接受咗創作公司「U Made This」450萬嘅捐贈，事後公開後作為「U Made This」母公司「GLOS」創辦人嘅沈旭暉就急急割席，唔知係咪因為沈旭暉係「共慘（產）黨員葉國華（個）『契仔』」喎。
帖文仲話，王百羽曾經參加被攬炒派稱為「小圈子選舉」嘅選舉委員會界別分組選舉，仲成功當選選舉委員，佢喺2017年更獲選為第十三屆港區全國人大代表選舉團成員，真係點睇都唔似「本土派」，所以佢今次參加「飯民」大台小圈子「初選」，只係混水摸魚撈油水，可惜好多「黃絲」都信佢係「本土派」。
「CC Kwok」就慨嘆：「香港人唔願接受現實，明明有啲人鬼到喊都唔肯割。」「Stephen Wong」亦批評：「呢條肥××今次現晒形啦！」「Kwokchun Cheng」就質疑王百羽呃公帑：「政府因為立會延任而宣佈（布）出晒出選人嘅所有選舉開支，我極度懷疑有人報大數呃公帑，講稿費50萬？字字千金呀？」