第六場、第三班、一二○○米。「總理」馬主賽義德團體第一次養馬，名字或者陌生，細看陣容係廄侶「上校」馬主，即係「總理」與退役「沙紙」半同主；上季來港初出千四米有多少追勢，好肯定會係三班夠用；今場賽前或臨場有雨，估計可再跑高多少。講番「總理」喺紐西蘭由一位女馬主擁有，半歲時被拎去拍賣冇人吼，再多半年，一歲再被拎去拍賣，底價減咗一半，結果底價兩萬紐元都叫唔到又要收番，最終「總理」三歲尾出道，竟然短短三個半月，跑五場贏四場，再高價被賣嚟香港，今次賽前贏好谷閘轉場，提防突如其來。
第七場、第三班、一八○○米。「喜」系馬主羅建生在港及外地養馬多年，連埋囝囝囡囡，家族前後養過廿幾匹馬，最出名係前馬王「喜勁寶」，喺○二年馬季贏晒三冠短途系列。上月中谷戰羅建生女兒羅詠賢名下嘅「喜勝駒」已贏馬，今期佢名下「喜盈寶」出賽。「喜盈寶」喺澳洲贏千四米，同埋喺千六米兩度上名，今季初試啼聲出戰谷草千二跑第七，開氣後上次增程一哩沿途外疊，直路上未被力策跑第六輸兩馬位；話晒老竇係日本馬王「龍王」，喺三班點會企唔住，熱夠身後要留神。