國際賽四場大賽過後，本年只剩下兩周便踏入新一年，回顧今年香港馬圈最叱咤風雲的人物，何澤堯、呂健威及姚本輝均是香港華人，他們均在過去一年踏上賽馬事業的巔峰。本地馬圈長期由外籍騎練所壟斷，本地騎練要爭奪大賽或者冠軍寶座從來不易。不過在今年終於改朝換代，繼七年前葉楚航之後，姚本輝再一次打破傳統四大馬房枷鎖，力壓告東尼及呂健威，首度登上冠軍練馬師寶座，成就不朽功名。
剛過去的香港國際賽日，由全華班組合為港爭光，揚威香港一哩錦標的準馬王「金鎗六十」，由馬主陳家樑、練者呂健威及騎師何澤堯全華班合力炮製。上述人馬今年八戰八勝未逢敵手，更橫掃了今年四歲系列三關賽事冠軍，揚威香港打吡大賽，開創了香港馬圈新一個輝煌時代。
面對嚴峻疫情，香港國際賽仍能順利舉行，確實難得。即使四場大賽，海外馬以三比一擊敗香港精英，但馬迷應該好高興見證新王者「金鎗六十」誕生，事關呢匹馬已跨季連贏十一場，出道十五戰累積十四場勝仗，累積頭馬數目已經超過「雄心威龍」及「爆冷」兩匹馬王，將力追累積十六W「好爸爸」同埋「翠河」，「金鎗六十」依家嘅成就，幾乎肯定會寫入香港賽馬歷史。
翻查香港職業賽馬史上頭馬最多賽駒，目前呢個紀錄由「永勝」、「精英大師」同埋「美麗傳承」（圖前駒）共同保持，呢三匹傳奇馬王都係累積十八W，「金鎗六十」五歲就有14W，但佢最犀利嘅地方，就係今季幾乎每次均行過對手，估計短期內跑中距離應該搵唔到對手，董事盃、主席錦標、冠軍一哩賽，隨時都係囊中物，所以「金鎗六十」喺下半季多添4W追平紀錄，好似唔係咁難。睇番傳奇馬王「精英大師」出道頭十七次出賽全勝寫下連勝場次壯舉，但「金鎗六十」亦已經連勝十一場，如果今季保持不敗，加埋下季六歲仍保持水準，一樣有機會打破呢個紀錄。
潮起潮落，在港累積十八捷、八勝一級賽、總獎金超過一億港元的兩屆香港馬王「美麗傳承」，於香港一哩錦標力拚得第五後，終於宣布退役。八歲老馬「美麗傳承」，剛戰以三又四分一馬位落後於頭馬「金鎗六十」，英雄遲暮已是事實，之後美麗系郭氏就在社交媒體表示落實「美麗傳承」退役事宜，掌舵人郭少明及後亦證實了消息，話「美麗傳承」已失去一切，今場完全無跑錯，若是以前的話，可輕易追上，所以退役是時候了，之後呢匹前馬王會運往澳洲同「美麗大師」及「精英大師」一起，至於佢最佳拍檔潘頓亦表示，「美麗傳承」退役，會時刻掛住佢，「美麗傳承」更係佢策騎生涯入面騎過最好嘅賽駒，希望呢匹一代馬王之後有愜意生活。