第四場「豹子膽」近三場獲冠亞季軍各一，四歲馬剛踏上升軌，只要交出相若水準，根本在四班絕對夠爭。「同有友」近五場直路賽獲一冠三亞一季全上名，全部係用見習生周俊樂一味靠放，今次轉來谷草轉彎有回氣位，強配潘頓值得重視。
第五場「駿馬風采」上場轉戰谷草輕鬆贏馬而回，粗身馬第一次跑快活谷即贏，相信之後會越跑越好，連捷可存厚望。「奇妙日」上仗跑第二名賽後驗出氣管有血，抖夠再來只要不復發有力還以顏色。
第六場「樂滿貫」於西澳洲戴羊毛面箍兩戰兩勝，第二仗跳班出爭二級賽卡拉卡達碟照贏，之後被高價購入來港，上次初出用陳嘉熙未盡發揮但已走光，熱身後再來今次可見真章。「輗多福」初出直路賽按韁輕勝兩馬位而回證明質高，今次渡江上陣對手未算太強，連捷望濃。
第七場「肥仔威威」上場轉去泥地千八米用薛恩都備受追捧，最終落第而回不大意外，今次重返三捷勝途谷草一哩，賽前從化贏好泥閘狀態回勇，有力施展回馬槍。「發財福星」上場用巫顯東放入第四名已呈現回勇，今次賽前工夫更見完整，屆時若賠率不太熱的話相當抵博。
第八場「金鷹翱翔」今季由何良轉投霍利時馬房，除打開在港勝利大門之外，更在跑馬地千二米搵到新出路，馬房谷草好開續好的例子實在多不勝數，今次原班再戰有力再接再厲。「超威星」季內頭兩場用潘頓一再搏失，上場出動到雷神加眼罩順利贏馬，締速已達三班標準時間，反映進度已重納正軌，值得再追。
第九場「帖木兒」來港之後健康曾有很多問題，但方嘉柏及幕後一直花心機及耐性操養，直至上季尾最後一場贏馬打開缺口，踏入今季更加兩戰兩勝，今次強配蘇銘倫壓陣，有力取得跨季四連勝。「金鼓齊鳴」近季跑谷草更勝沙田，踏入今季三戰獲冠亞軍各一，只係前仗排大外檔輸形勢，贏馬後有正常操練準備，大有機會梅開二度。