第七場､第三班､一六五○米。「陽光戰駒」前仗在谷中一哩取得冷W，上賽升回三班再戰，角逐騎師賽抽到女騎師杜苑欣上陣，而且換過一批對手，結果跑來有前冇後大敗十馬位。拚後備戰未有放緩，埋門再試大閘走勢點到即止，今仗易配波健士排七檔起步，冷門在此。
第八場､第三班､一二○○米。「帆哥兒」話晒都係「范高爾」子嗣，可是在港跑了三十五仗，只在三班泥地千二取得一W。再看季內跑過六次，上回出爭谷草千二配郭能，力策下跑第四，今次再戰三班同程，小方安排馬兒易配熙仔減至一一一磅，只要發揮水準當有一爭之力。
第九場､第三班､一二○○米。苗禮德一向作風喜省招牌，季內接手轉倉馬交出亮麗成績，季內的「有得精彩」及「路路之星」等駒，所以馬房收得「順意寶」，交出勝仗乃遲早問題，會否是今仗就不得而知，但做足一切準備，唞夠賽前試埋大閘充滿誠意，再搵埋旺人賀銘年主轡，擺出一副搏殺格局。