●李家偉批評《獨媒》報道失實。 fb截圖砌陳樹英用區會錢宣傳鴿黨 「容忍程度已達包庇程度」
利益當前，攬炒派區議員經常攻擊來攻擊去。屯門民政事務處早前接獲投訴，指屯門區議會主席、民主黨陳樹英利用區議會出錢買嘅防疫物品，為佢個人同民主黨宣傳，所以要屯門區議會轄下嘅財務、行政及宣傳委員會考慮係咪要向陳樹英發警告信。《獨立媒體》近日報道有關事件，指該委員會主席李家偉處理事件時主動要求陳樹英避席，「做法引起在座區議員譁然。」李家偉事後就喺facebook批評《獨媒》嘅報道失實，但就乘機潤陳樹英兩句：「我對今（當）天事件的容忍程度，已經遠超偏袒甚至達到包庇的程度。」
●香港文匯報記者 雨航
《獨媒》2月26日以「民政指收投訴 斥用區會物資作個人宣傳 陳樹英批打壓：配合建制小動作」為題報道聲稱：「民政處文件內並沒有寫出被投訴的區議員姓名，惟委員會主席李家偉要求陳樹英先行避席，做法引起在座區議員譁然。陳樹英激動拍枱稱：『法庭都可以畀人申辯，點解我要避席？』」「李家偉一度在會議上要求委員會表決是否有『足夠證據』證明投訴屬實、沒有疑點，但民協周啟廉質疑表決的合理性，『我哋唔係法庭，你係用咩標準要我哋去裁決？』」
冇指名道姓要求任何人避席
李家偉事後喺facebook發帖批評《獨媒》嘅報道失實，聲稱自己喺整場會議中都冇指名道姓要求任何人避席，由始至終都只係以「相關議員」嚟稱呼個案中嘅同事，而自己向委員會提出嘅問題亦只有一個，就係「是否受理並處理投訴」，所以根本冇就案件作出「裁決」同「審判」喎。
佢又好似好委屈咁話：「會上被『泛民主派』前輩說成：『淨（剩）係聽民政指令做嘢』『指引偏幫民政』，我希望大家明白，如果該前輩所言屬實，被投訴的議員冇可能在整個討論環節可以在席自辯，該名同事亦冇可能不用先行舉手直接自行『開咪』，甚至發言多達整整七次屢次超時仍然不被阻止。我對今天事件的容忍程度，已經遠超偏袒甚至達到包庇的程度。」
與李家偉同屬「素人」嘅屯門區議會副主席黃丹晴就轉載李家偉嘅帖文，話會上大家並非審判個案，只係為咗避免公眾認為佢哋包庇「同路人」，因此必須秉公辦理喎。
網民直言《獨媒》冇公信力
網民「Cathy Yau」直言《獨媒》冇乜公信力：「哩（呢）年幾，我自己都少睇獨媒，唉。」「Kwan Lee」就話：「獨媒都唔係第一次，立場都唔好得幾多，仲要經常都係插新嗰班區議員，反而傳統『泛民』又唔點理喎。」「Ho Lam Chan」就話：「如果唔係民主黨，唔知佢哋又會唔會嘈呢，係咪新舊『泛民』睇大家唔順眼呀？」