●自稱「C爸」的居英港爸分享做「太空人」的辛酸經歷，指移民令一家人情緒出現問題。 fb截圖早前英國政府宣布所謂BNO「5+1」入籍政策，一些港人以為藉此方式移民到英國，唔少手持BNO嘅黃絲都以為自己好好彩，個個撲住去申請移民。不過近日就有位自稱「C爸」嘅居英港爸分享做「太空人」嘅辛酸經歷，話移民搞到一家人嘅情緒都出現問題，認真得人驚啊！
「C爸」就話自己上年11月時同太太留低咗小朋友喺香港，兩夫婦先去英國搵樓，初時都無問題嘅，但後來因為太太要返香港處理生意同屋企嘅事，於是「C爸」就接咗小朋友去英國生活。
小朋友想家 家庭拗撬多
「C爸」分享話：「一開頭都OK 㗎，小朋友好開心，因為屋企又大咗，又有個後園踢波。但係其實只係過咗一星期左右，小朋友就開始掛住香港同『C媽』，而且越嚟越嚴重。有試過食飯時同臨瞓前『發作』，真係喊到收唔到聲。」佢仲話覺得小朋友越嚟越反叛同包拗頸，需要深層心理輔導嘅次數就越嚟越頻密，情況令人擔心，仲形容當時嘅情境「堅恐怖」。
而一個人湊住小朋友嘅「C爸」亦唔好受，因為所有家頭細務都係一個人做晒，然後又要處理小朋友嘅問題，包括home schooling再加陪玩，有時仲要做埋心理輔導，加上時不時同太太有拗撬，搞到大家去到英國嘅心理狀態都越嚟越差。
一個人喺英國兼顧家庭同工作壓力真係唔容易，「C爸」就話好彩自己只係同家人分開兩三個月，如果兩三年嘅話，真係想像唔到會有咩後果！對於有人問佢做「太空人」值唔值得同好唔好，佢就話：「如果長時間，我就絕對有保留，因為心理壓力呢樣嘢，話爆就會爆，陌生環境再加各種壓力，真係唔講得笑。」 ●香港文匯報記者 倪思言
