網民譏「攞到利益先齊上齊落」
近日有指「民陣」正被警務處國安處調查，倘屬實有可能會被依法取締。傳言一出，街工、「新民主同盟」、民協已先紛紛「縮沙保平安」，退出「民陣」工作及會議。昨日有消息指，民主黨都唔執輸，決定跳船。唔少網民都睇到眼火爆，大鬧佢哋：「攞到利益先齊上齊落！」利字當頭，為保平安，網民又真係唔好怪白鴿黨先得。●香港文匯報記者 黃書蘭
攬炒派齊齊跳船，唔少網民都鬧班人講就「齊上齊落」，事實就係「煽人衝、自己鬆，害死『手足』」。「Hon Kai Ho」話：「又話齊上齊落！有監一齊坐先至係手足呀嘛！」「Kingking Wen」就話：「全部都係一句口號，叫班傻仔傻女同佢地（哋）去衝。」「Hui Jacky」都話：「上左（咗）賊船記住監獄『泛民』害左（咗）你哋，未來有糧支，變左（咗）一無所有。齊上齊落（啲）白痴口號，講一套做另一套。」
有網民就鬧班攬炒派個個利字當頭，實則無義氣，貪生怕死。「楊洋」就感慨：「情與義。值幾金？」「Ck Wong」話：「攞到利益先齊上齊落。」「獨立調查委員會」就指：「又話攬住來跳崖，扣押幾日已腳軟。」「Michael Chan」仲設計對白：「快跳船，我係老千好怕死。」
網民：證國安法震懾力
「白蕊」就話反映香港國安法有震懾力：「國安法勁過核彈個個怕。」「Tsin」都話：「阿爺不發威，你當係病貓，阿爺動動腳指（趾）頭，曱甴驚到屁滾尿流！」
唔少網民質疑咁快跳船係因為心虛做咗違法嘢，仲建議當局繼續依法追究。「中華英雄」話：「割席割得快，『民陣』一定有古怪。」「William Mak」就話：「退出也要查，一直挖出黑金來源，把黑暴全部繩之於（以）法。」「oontien」就奉勸：「回頭是岸，不做民族敗類，漢奸！」
fb專頁「Online 在線」則建議：「民主黨亦宣布即時退出『民陣』工作及會議。 看來，『民陣』被調查是否有收取美國NED的資助，可說是空穴來風，未必無因。日後，如果查證屬實，應該把『民陣』列為恐怖主義組織，也把NED列為資助恐怖主義的組織。」
個個都跳船，睇嚟真係個個都怕搭沉船。早知今日，又何必當初呢。