第二場、第五班、一六五○米。馬主杜偉強今季將「喜佳龍」轉俾方嘉柏訓練，結果已贏咗兩場，今季新寵「喜傲龍」亦支持方廄，名下馬只剩番「喜進龍」由蘇偉賢訓練，後者當然要肉緊啲，希望盡快贏馬交代，以免馬匹轉投方廄。「喜進龍」拍賣馬身價四百五十萬元，季內曾跑谷草千二米造出全場最快末段衝上來跑第五，證明五歲北半球馬絕非朽木，今次棄跑同日一千米，越程向一哩進軍蠢蠢欲動，隨時可將大局推翻。
第四場、第四班、一○○○米。馬主黃豪過往養過五駒，只有「東江駿馬」贏過三場，其餘四駒冇贏過就退役，當時幫佢贏馬係葉楚航，但佢近年就改為支持蘇偉賢，雖然「急急腳」未贏過，只得三席亞軍，但今季新馬「向上游」依然支持蘇偉賢馬房。「向上游」三歲仔來港落地先在從化訓練，然後返港再做工夫，上仗初出得十二倍證明幕後自視不低，熱身後可以博進步，買定冇衰。
第八場、第三班、一二○○米。「騰飛塔」馬主桂生悅為吉利汽車行政總裁，近期在港澳頻頻取得進帳，除了「騰飛塔」在港一出即勝之外，澳門豢養的「飲水思源」及「櫻花路」都有建樹，手風正順。「騰飛塔」在港一出即勝田草千二，末段加速力驚人，再出負頂磅得第二，上次升班加程難度太高，加上馬匹途中脫口未算真敗，查季內兩次渡江試閘俱跑第二，早已埋下轉場伏線。