第七場、第三班、一二○○米。「迎有」二月十日因右前腿不良於行退出，但翌日已復課可見問題不大，三月三日初出谷草千二米，跑第八輸五個馬位。睇番呢匹澳洲自購馬外地七戰獲兩冠一亞兩季，贏出一三五○米處女馬賽及千四米讓賽。本身血統出眾，同父馬有兩屆香港短途錦標冠軍「紅衣醒神」，至於「迎有」母親出自「求名」，曾勝千一米，「迎有」更是新加坡短途好手「傑精神」同母弟弟。「迎有」目前身處三班唔輸蝕，熱身後隨時有驚喜。
第九場、第三班、一六五○米。馬主何偉文九十年代已養馬，當年同方祿麟及胡森合作愉快，照計應該會支持親屬方嘉柏，但何偉文就冇咁做，近年改與呂健威合作，好似現役「歡欣福星」，上季一出即贏新馬賽，今季踏入四歲繼續進步，已得兩場頭馬，近兩仗轉跑谷草一哩得一冠一亞一季試出彩虹。「歡欣福星」前場在巴度胯下贏馬發揮一絕，沿途睇到莫雷拉「喜盈寶」中段發力，但巴度十分熟悉「歡欣福星」馬性，最緊要搵到自己節奏，結果留到入直路才發力，拿揑發力點很準確；上仗再爭一哩後上不及，今次人馬合作再接再厲，可期有精彩演出。