反中亂港分子最常用嘅套路就係做冷氣軍師，煽動無知嘅「手足」瘋狂「送人頭」，但自己就可以喺後面䟴䟴腳食血饅，賺足政治利益。講緊嘅就係已經「走佬」英國好耐嘅前「香港眾志」主席羅冠聰（羅三七），佢日前喺facebook發文，稱「抗爭期間，香港浮屍湧現」，並以緬甸亂局中多人傷亡一事問「手足」「你會願意為香港而死嗎」，搞到好多網民都圍攻佢，因為事實上佢先係最縮骨嘅一個，明顯「叫人衝，自己鬆」，面皮簡直比三尺更厚。
羅三七日前發文造謠，話「抗爭期間，香港『浮屍湧現』，『不明不白』的案件頻頻在新聞中播出。當中『真相』為何，至今仍未知曉」，跟住佢又開始煽動，稱緬甸亂局中多名示威者「被射殺」，包括一名17歲華裔醫學生Khant Nyar Hein遭到軍警槍殺，但喺�嘅葬禮上，親友唱着革命歌曲，一眾同窗醫科生穿上白袍，並舉起代表抗爭精神嘅三指手勢悼念。
已經「走佬」英國逍遙法外嘅羅三七好無恥地話，「在香港抗爭示威中，我們經常會被問到『你會願意為香港而死嗎』？」「緬甸好多人用行動表示願意」，又聲言「假如我們不反抗，我們就只能活在軍政府的恐懼下。」成篇嘢一句講晒，即係催「手足」去「送頭」。
面對面皮厚過三尺嘅羅三七，fb page「香港怎麼辦」就P圖譏諷羅三七，話「『阿聰』問『阿衝』會唔會願意為香港而死？咁阿聰自己呢？」輔仁媒體總編輯容樂其都轉發帖文，揶揄「唔好死」。網民「Paul Leung」就幫佢答：「我知佢既（嘅）答案一定係No。」
事實上，除咗羅三七嘅失智粉外，好多網民都清楚認識到羅三七嘅險惡用心。「Kathy To」揶揄：「『走佬』嘅人問留低嘅人願唔願意去替死？如果你願意，預祝你一路好走。」「Caro Wong」質疑：「自己著（着）草逃避，仲好意思叫人死？」「Chung Keung Tsui」睇穿：「佢不過用人命衆（眾）籌來抬高自己，命係你地（哋）嘅，死多啲我有多些政治本錢。」●香港文匯報記者 鄭治祖