屢縱員工無罩反誣食環「針對」 網民晒「罪證」鬼打鬼
疫情下人人自危，就算「手足」都冇情講。黃店「光榮冰室」嘅荃灣分店，近日因為違反食肆防疫禁令而被食環署罰暫停晚市堂食3天，結果唔少黃絲忿忿不平，聲稱食環署「針對」黃店執法，但有網民踢爆原來唔少「同路人」過往都有批評「光榮冰室」嘅員工唔戴口罩，質疑成件事係自己友篤灰。其實，唔戴口罩搞到大家一齊染疫咪係名副其實嘅攬炒囉，唔明點解黃絲會唔鍾意嘅呢？●香港文匯報記者 雨航
「光榮冰室」近日喺facebook貼出一張食環署嘅告示圖片，上面列明「光榮冰室」荃灣店由3月23日至25日期間，由晚上6時起需暫停晚市堂食，營業時間內一張枱亦唔可以坐多過兩個人。呢個正係現時違反食肆防疫禁令嘅罰則，但「光榮冰室」就講到自己好似俾食環署「針對」：「你話我員工唔戴口罩封我3日（天），但員工用膳中，你可唔可以表現（演）一下戴住口罩用膳？」「光榮」仲hashtag話「隔離（籬）間藍店你直行直過望都唔望」。
「冰室」死撐無錯 盲黃絲照支持
呢啲時候總會有黃絲只問立場、不問是非咁衝出嚟維護黃店，「Leslie Chu」就話：「無需討論內情，明搞，明屈，即使你再跟防疫規則做都係一Q樣，當又做下（吓）宣傳，唔好勞氣！」「Edith Yu」亦聲稱：「總之無需理由，佢要砌你就砌你。」
不過，今次網民嘅留言並非一面倒，「黃梓倫」就指出，「光榮」嘅其他分店都頻頻出現員工做嘢時唔戴口罩嘅問題：「雖然係黃店，但你地（哋）深井店既（嘅）廚房佬確確實實成日都唔載（戴）口罩。有次我經過廚房後門個廚房佬以為我望佢有冇載（戴）口罩，×完我老母再問我望乜×野（嘢）。」「Josh Chan」更鬧返「光榮」：「你收×啦！無端端食環會屈你！」
有網民就搵返「連登」幾個post嘅連結嚟幫大家回帶，原來過往唔少「同路人」都試過將「光榮」員工唔戴口罩做嘢嘅相瞻W「連登」公審，當時唔少人都跟隊批評「光榮」散播病毒畀「同路人」，近日亦有人喺「香港金黃沙嗲牛肉群組（謝絕所有不同路人）」嘅fb群內批評，「光榮」嘅侍應同廚房佬「時戴時唔戴口罩」。
「Bowie Wong」呢類人就「幫親不幫理」，對自己「手足」充滿怨氣：「多謝『連登仔』同啲人喺fb督（篤）灰囉！」「Wendy Wan」就話：「都唔知係咪俾人督（篤）得多先俾食環重點關照，今次真係多謝晒。」
食環署其後回覆傳媒查詢時話，當日巡查位於荃灣兆和街一帶食肆嗰陣，發現兩間處所內有員工喺製作食物時冇佩戴口罩，違反《預防及控制疾病（規定及指示）（業務及處所）規例》（第599F章），並已即時作出檢控。