●「無神論者的巴別塔」問劉細良點解唔公開「城寨」盤數。 「無神論者的巴別塔」fb截圖賣樓袋4380萬元仲叫人課金 網民譏黃絲盲撐太笨
攬炒派近排頻頻賣樓走佬，日前又再有人沽售物業。據《蘋果日報》報道，網台「城寨」創辦人劉細良、鄺頴萱夫婦將北角半山豪宅以4,380萬元售出，成交價創項目新高。劉細良原來咁疊水嘅消息一出，就令班成日俾人踱水嘅黃絲呻笨，鬧爆佢：「正宗人血饅頭大王。」有網民就譏笑：「呃埋錢走埋佬歎世界，一早就拆穿晒啦，係你班笨×黃絲唔聽咋......不分化不割席呀！」●香港文匯報記者 黃書蘭
「無神論者的巴別塔」facebook專頁噚日撰文咁話：「其實黃屍（絲）神棍何其多？劉細良嘅『城寨』只係其中一個比較有代表性嘅......點解『城寨』賺咁多錢，仲要招請義工做牛做馬？......偏偏今時今日黃標冷氣軍師月入過百萬，前線『勇武』無錢開飯咁×離譜嘅問題，卻連聲都唔聲......鬼咩，班左膠同飯民Friend底，黃標KOL CAP ×晒啲資源都不分化不割席呀！」
要交會費又要「科水」聚餐
「城寨」成日叫「手足」課金，又整埋patreon（眾籌會籍），唔少網民都大嗌掠水。好似「Henri Lam」咁話：「好憎見到啲patreon。好等錢使？」「Arbulu Funn」就話：「老千愛財，取之有計。真係好多豬follow班×噏KOL咖（㗎）！連魑魅魍魎既（嘅）猿猴家族都咁多fans㗎！」
「GO Zoo」都問：「見佢又賣洗手液，又賣消毒藥水，又賣3D打印的唔知乜×。仲要鬧人哋出價低！又要交會費，又要『科水』聚餐...... 有無幫過HK人？」「孔明」就問：「這是黃色經濟圈定黃色刮籠圈？」
黃絲後悔「覺得自己好傻」
今次劉細良被揭疊水，就令唔少「手足」恍然大悟。「Niffy Chan」話：「唉，2019年有一段時間都好捧佢場，回望過去都覺得自己好傻仔。」
「華浩祥」都話：「出×晒名做乜×都可以大淡（啖）人血饅頭！食完又唔回饋返香港，呢種恨我到死嘅一日都會記著（着）。」
「Monchihi Hihi」就話：「點解劉細良咁有錢都仲叫人課金嘅？課金比（畀）佢果d（嗰啲）人分分鐘樓都無疊，公屋都無間，衰×過民主黨用政治獻金買音響喎！」
有網民則笑班黃絲盲撐。「Li Edith」話：「俾（畀）機會大家買贖罪券！」「Koo Wing Bun」就話：「叫完『我真係好×鐘（鍾）意香港』，跟住就賣樓移民。」
「Paul Lee」就用設計對白：「四千萬唔夠呀，你班死蠢『城寨』人仲唔課金比（畀）我歎世界。」