●黃店「糖水雄」話位客人已道歉，所以「為了保障及尊重客人私隱，不公開名字」。 fb截圖一名住珀麗灣嘅黃絲日前叫外賣幫襯黃店「糖水雄」，點知十世都唔落樓攞外賣，搞到「糖水雄」個外賣員企足一個鐘，仲差啲走咗艘船要等多一個鐘，令到好多網民不滿，並要求「糖水雄」公開呢位黃絲客人嘅名。不過，後來「糖水雄」話位客寫咗一大篇文字向佢哋道歉，所以「為了保障及尊重客人私隱，我們將不會公開客人的名字」。爆咗同路人衰嘢出嚟又扮好人，咁潛台詞係咪唔道歉就會公開晒所有私隱呢？
話說，日前「糖水雄」喺facebook發帖，話有一位客人遲咗一粒鐘，打極電話都唔通，當行到碼頭終於打得返畀佢，但仲有10分鐘就有船可以走，而且一個鐘頭先一班船，「佢依（??）家派咗工人姐姐落嚟拎外賣，佢話仲有10分鐘先行到過嚟，究竟我趕唔趕到呢班船呢？」呢啲咁喪心病狂嘅客人，令到好多網民不滿，紛紛叫佢放低外賣就走人，更有網民要求公開呢位客人嘅名，「William Lai」就話：「如果條友唔公開道歉，你唔介意開名都可以，我地（哋）可以家法處置，blacklist曬（晒）呢條友可以參加嘅團購。」當時「糖水雄」就無正面回應係咪會公開名。
可能見到個勢唔對路，呢個客人即刻嗱嗱臨聯絡「糖水雄」，並寫咗一大篇文字向佢哋道歉，並承諾將來務必改善自己嘅態度，唔會再有遲到嘅問題，所以「糖水雄」就扮晒嘢話「為了保障及尊重客人私隱，我們將不會公開客人的名字，不希望造成當事人將來訂購其他餐廳團購時面臨壓力。」令人質疑佢哋嘅潛台詞係咪位客人唔道歉就會公開晒所有私隱先？ ●香港文匯報記者 鄭治祖