跑馬是否有搏殺決心，馬迷眼睛是雪亮的，尤其是大師傅，潘頓騎希斯馬房的兩倍半大熱門馬「包裝大獎」，直路坐包廂塞死，捧場的馬迷連隻馬一步衝刺都未見過，咁就輸咗投注金錢，相反，同樣是兩倍半的「飛輪閃耀」，儘管只跑得第二名，但潘頓全程精妙的取位，都讓馬迷看到他的拚搏決心，即使是輸俾莫雷拉策騎的「喜駿駒」，也算是優勝劣敗的結果，投注在「飛輪閃耀」身上的馬迷，也是輸得心服口服。
要分析潘頓的坐騎是如何輸掉，是輸形勢，還是輸實力，馬迷要用自己的經驗來判斷，否則一旦被輕看了這些落第的馬匹，下仗可能會有截然不同的表現。正如今次由潘明輝策騎的「莫浪求」（圖前駒），這駒之前經已連續兩仗交由潘頓上陣，前一次這駒重回三班列陣，潘頓即接手主理，十三駒列陣爭田草千二米，因排十二檔關係，鞍上人非常好心機咁發揮呢隻馬，起步便搵位楔，到咗入直路便積極突圍，可惜前路被其他賽駒擋住，遲遲未能望空衝刺，最終只取得一席第五名，輸一位三給頭馬「佳景福星」，這仗最後百多二百米是沒有跑過。再出馬房依然安排這駒出戰田草千二米，鞍上人依然是潘頓，今次雖然排了個較佳的五檔，但面對的是星味十足的「速遞奇兵」，換句說話，任潘頓如何努力，這仗「莫浪求」最叻只是跑第二名，而這席第二名，是好大機會給評磅員加分而之後要回升二班作賽，結果潘頓起步將隻馬留在尾疊，全程取道外疊走，最後衝得第四名，令到評磅員沒有給牠加分之餘，仲減咗隻馬一分，即係繼續留在三班作賽，今次馬房把「莫浪求」由潘頓換上潘明輝，大潘換細潘，賠率一定有得分，再加上今場無「速遞奇兵」這類強手，幕後肯打硬仗這席頭馬應可手到拿來。