香港選舉制度已完善，唔少人都關注班「飯民」以至攬炒派何去何從。要員幾乎都官非纏身嘅社民連噚日喺facebook發所謂嘅「決議文」，話自己唔會參與今年嘅選舉委員會選舉同立法會選舉，仲叫其他「民主派」都唔好玩𠻹。不過，唔少心水清嘅網民都笑社民連啲人分分鐘到時都坐晒監，點參選呢？有人揶揄「飯民」係時候還人情︰「社記上年陪民主黨一齊唔簽『墨落無悔』，今年係時候叫民主黨陪你地（哋）一齊唔好選啦。」
社民連噚日以《奮力抵抗 直至勝利》為題發表「決議文」抹黑完善選舉制度，聲稱香港國安法「重創公民社會」，又話撤銷違誓議員資格嘅規定係「企圖顛覆選舉」，仲話唔可以再依仗議會嚟「推動民主」，煽動市民參與「抵抗運動」「抵禦中共」喎。
社民連又話，喺「民主派初選」度「獲授權」參選立法會嘅人已坐晒監，𠵱家仲可以參選嘅「民主派」未獲「授權」，如果喺「民意大多反對」嘅情況下參選，係「自絕於群眾」，所以社民連堅拒參與選委會同立法會選舉，仲拉埋其他人落水話「更期望『民主派』同道拒絕與『不義』選舉制度合作」喎。
攬炒派屯門區議員張錦雄留言話，未來如果邊個參加立法會選舉，佢都會視之為「投共走狗」，仲好小學雞咁話要同人絕交𠻹，真係好有「民主派」風範。
佢哋可能以為自己好悲壯，但個「決議文」出咗成11個鐘，先得17個留言，其他網民睇到呢個新聞，反而覺得選舉冇咗亂港分子係好事𠻹。「花生友」就話：「真係好消息，社民聯（連）有自知之明，知道自己點樣發誓當食生菜，都無人信呢個組織唔係一個破壞社會安寧嘅政團，摺埋佢仲好，無眼屎乾淨盲。」
網民指其他「飯民」應一齊消失
「Lo Pak Hin Oscar」亦覺得其他「飯民」應該一齊消失︰「社記上年陪民主黨一齊唔簽『墨落無悔』（攬炒派自證罪行嘅初選聲明），今年係時候叫民主黨陪你地（哋）一齊唔好選啦。」「12121212」就睇死社民連咁講係因為佢哋根本派唔到咩人參選︰「全部入了赤柱，點參選？」 ●香港文匯報記者 黃書蘭