今屆日本打吡賽前全場唯一的三歲雌馬「里見女尊」，能否一舉擊敗同齡雄馬，展現「女尊男卑」局面，固然是討論熱點，但可惜事實與理想不符，「里見女尊」喺呢場東京優駿之中，臣服於「大帝」只得第五名。「里見女尊」失落打吡之後已準備運返北方牧場天榮放草，而練馬師國枝榮透露，馬女經過一場超級硬仗之後，需要一段較長時間復元，預期要到秋季才會復出，並會重返同齡雌馬陣線，恃其實力再向各項雌馬大賽進軍，首要目標當然係三冠三歲雌馬大賽尾關，十月中舉行之秋華賞。對於「里見女尊」在日本打吡之落敗表現，練馬師國枝榮又指出，由於步速偏慢，此駒大部分途程在外疊競跑，至入彎時受壓更要提早發力，被迫推進至前列入直路，際遇欠佳下力弱跑第五，馬女已算有交代，國枝榮深信待此駒養精蓄銳於秋季復出，屆時必可再次展現勝利風範。
另一邊廂，上周五十四歲悍將巫斯義策騎「實勁力達」攻下一級賽伊斯巴翰錦標，相隔逾兩年半再贏一級賽，果然寶刀未老，上周日，巫斯義女婿李寶利喺美國攻下一級賽蘇密加一哩錦標，認真喜事重重。李寶利自從由香港轉往美國發展之後事業一帆風順，早前騎者喺美國聖雅尼塔馬場上陣，策騎Smooth Like Strait出戰美國蘇密加一哩錦標，此駒轉入直路時走甩，末段力頂到尾，為李寶利再帶來一級賽勝利。李寶利賽後表示，Smooth Like Strait表現忠心，值得擁有一場一級賽頭馬。
上周日嘅日本安田紀念賽，喺當地唔係咩極重要一級賽，同之前嘅日本打吡、橡樹同稍後嘅寶塚紀念賽根本無得比，但估計係香港馬迷最先認識嘅日本賽事，皆因香港馬首次遠征日本，正正就係跑呢場千六米一級賽，主角為九四年白理維訓練嘅「勝利拍檔」。至於大家最有印象嘅安田紀念賽，梗係馬王「奔騰」喺九八年跑第二嗰次，記得當日比賽片段係咩都睇唔到，因為東京競馬場傾盤大雨，結果「奔騰」即使未能威脅頭馬「大樹快車」，但攞到亞軍已經非常犀利。到咗二千年嗰屆，就係香港賽馬史重要一頁，就係「靚蝦王」後上封王，亦係首次有香港代表遠征日本贏一級賽，去到○六年就輪到另一匹香港佳駟「牛精福星」揚威安田紀念賽。點知「牛精福星」贏完，就再無香港佳駟贏呢場一級賽了。
若說起每位騎師最具代表性的賽駒，何澤堯一定是準馬王「金鎗六十」，曾來港客串的英國騎師祈義理，則肯定是前歐洲馬王「范高爾」，人馬一起締造十四戰全勝佳績，可惜在「范高爾」退役後，祈義理策騎事業隨即一落千丈。至於史卓豐，今季若非幸運夥拍「佳運財」（圖5號）出賽五戰五勝，現時頭馬數目比郭能、波健士等還要差，毫無疑問此駒是他今季代表馬。