|
李自明
癲狗幫（社民連）和公文袋（公民黨）之前先後提出五區總辭及雙辭方案，更以大蝦細，當一眾蚊型黨「冇到」，出盡法寶只想焗白鴿黨（民主黨）入甕，可惜「你有張良計、我有過牆梯」，任癲狗幫3丑及公文袋大狀如何扭盡六壬，一眾白鴿也拍拍翅膀「放晒飛機」，拋出黨內分歧強烈作為最佳擋箭牌。早向自明點出總辭勢將無疾而終的政壇高人，聽見反對派大佬馬丁（李柱銘）大轉口風，不禁爆笑說總辭已淪為政壇「超級爛尾樓」，癲狗幫雖仍矯揉造作聲稱「辭梗」，但面對白鴿黨「睬你都傻」，公文袋已露縮沙之意，3丑恐怕已後悔「當初講得太口響，現在騎虎難下」。
白鴿黨吹「冷風」 料否決總辭
政改諮詢文件最快本月中出爐，反對派本欲借五區總辭炒熱氣氛，惜坊間反應冷淡。白鴿黨前晚召開集思會後大吹「冷風」，有黨員亦私下向自明表露心跡，直言將會在下月13日舉行的會員大會上否決五區總辭的建議。
細究個中原因，白鴿黨內人士稱，「大政治」層面，當然是反對派陣營各黨為爭話語權勾心鬥角、補選無必勝把握、擔心浪費資源人力等等﹔「小政治」層面，則是有飽受黨內大佬壓迫的白鴿中坑，與蚊型黨中人同仇敵愾，對陣營內「大佬」連月來的咄咄逼人極度不滿：「佢哋實行集體唔畀面，起晒飛腳，搞到馬丁班人都只可以暫時鳴金收兵，對總辭轉咗口風。」
2012「上位」有機 黨內中坑接受
為免窩裡反，馬丁「轉𡟼」安撫，但自明收到風，白鴿中坑並不領情，皆因反對派「大佬」聲言堅持否決2012年優化方案，與陣營內的地區中坑立場完全相反：「05年�膠葷_決，班大佬仲可以攞委任區議員作文章。如果今次委任區議員冇得玩，立法會多10席，其中5席係由區議會直選議員互選產生，我哋個個等足咁多年，先等到上位機會，如果班大佬話之你再玩嘢，地區實會大反彈，到時仲難搞。」
政壇高人話，雖然五區總辭無疾而終是意料中事，但反對派總算還能「揸住雞毛當籌碼，同政府講吓價」﹔但白鴿黨作為總辭「必要發展商」之一，如今臨陣「抽起資金」，頓令五區總辭淪為政壇「超級爛尾樓」：「你自己都爛咗尾，又點用來叫價呢？」
公文袋終露「退意」 3丑騎虎難下
癲狗幫3丑也深知大事不妙，昨日舉行黨團會議急謀對策「補飛」，不過「屎橋不如無橋」，政壇高人笑說：「3丑話自己加上公文袋派出兩個議員，總辭照樣可以成事。但公文袋都唔蠢得晒，黨魁阿豬余（余若薇）即話對此建議持保留態度，因只得兩黨參與會被市民誤以為反對派分裂喎！都話買樓要小心睇清楚售樓書，總辭呢個樓花擠一擠就咁多水分，真係搵鬼買囉！」
正是「早知今日，何必當初」，政壇高人坦言，3丑「話講過咗籠，收都收唔番」：「一眾反對派蚊型黨一早出晒口術，佢哋拍拍籮柚，話民意唔支持，陣營內冇共識，就可以笑笑口一鞠躬離場，但癲狗幫同公文袋之前講到一定去馬，依家突然縮沙，唔俾人笑死，都俾一人一啖口水浸死啦！特別係癲狗班激進支持者都等住睇你場騷，你話唔玩，班後生仔點會肯制？未來就睇吓狂郁人有咩新招，我就睇死3丑唔夠薑自己玩總辭啦！」
|
