 放大圖片
上個禮拜六，兩位新公司騎師披甲上陣，分別係李寶利及艾兆禮，李寶利對香港馬迷唔算陌生，因為佢上季經已客串過一段時間，而且成績都唔錯，呢次重臨舊地，甫一上陣即贏隻「手到拿來」，可能仲未太過適應番香港沙田馬場呢種寸土必爭嘅節奏環境，贏「手到拿來」連鞭都跌埋，可以話雞手鴨腳，不過始終冇令擁躉失望。而另一位公司騎師艾兆禮成績則麻麻，可能仲未有馬房賞識，冇乜實力馬交俾佢上陣，上個禮拜七匹坐騎，只有高伯新交俾佢嗰隻「藍雪山」跑第五名有獎金，其餘全部得策騎費。
當然新嚟公司騎師冇乜馬房撐，都好難有成績交出，但艾兆禮果然醒目，呢個禮拜日，個個圈內人諗住去濠江睇下賽車之際，佢冇跟大隊一窩蜂咁去玩，相反趁有時間立刻走去唔同馬房度打招呼討實力坐騎，結果俾佢刮到一批馬騎，而支持佢嘅馬房，更是來自華洋倉，總之冇人肯騎嘅馬，搵佢一定跑。周日，有馬房手足見到佢入容天鵬馬房探班，因為倉主應承俾隻「帝聖好好」（圖前駒）佢騎，呢隻馬上次交俾莫雷拉跑谷草千二米，雖然話第一次跑谷戰，但因為跑短途演出準，本身有速度，再用上一個莫雷拉，結果被捧到三倍大熱門，最終只係跑第七輸三個馬位返嚟。「帝聖好好」未能交出成績，當然令台前幕後失望，今次換人，倉主亦抱住好似沈廄隻「超有利」咁嘅心態，莫雷拉未必次次會演釋到隻馬最佳水準，「超有利」可以話係最佳例子，所以呢隻「帝聖好好」就係希望用一啲級數都唔錯嘅大師傅拚個明白，呢次馬房同隻馬再揀谷草千二米列陣，屬艾兆禮嘅考牌馬。另一方面，容廄近期成績唔錯，馬房經已安排下一個禮拜一到三門仔食海鮮慶功，屆時將會邀請潘頓及幾位馬主出席，倉主希望俾馬房上下員工一個鼓勵。
|
放大圖片
