 放大圖片
上個禮拜澳門舉行格蘭披治賽車，唔少圈中人都好此道，大摩原來都喜歡睇賽車，聽聞佢晨早交低晒倉務走去澳門睇賽車，不過佢臨出發前，經已交低所有倉務俾個仔接手監督。上個禮拜日，佢臨去澳門前吩咐細摩仔下午一定要搵人替「贏得」及「獅鷲」兩隻馬操練，結果周日下午，「贏得」見到王志偉喺馬房踱步，拍住另外一隻有賽程馬「獅鷲」，後者用一位策騎員尹志傑，只見呢一對馬，一路喺地堂拍踱，一路見細摩仔對眼打雀咁睇到實。「獅鷲」神態及火氣總係差少少，目前評六十一分，處於一個尷尬水位，減多一分就可以落班，今次上陣，雖然跑開齋路程一哩，但會唔會跟多鋪等降班郁，真係好難估，但狀態唔屬於引死人嗰隻，中規中矩都係唔好理佢住，但另外一隻「贏得」，踱嚟火噴噴，而且毛色立立令，一眼睇落去，可以話人見人愛，狀態又回復爭勝水準。今季，馬房先安排佢跑田草千六米得第五，輸兩個半馬位俾「桃花心」，其實，呢場佢經已跑得唔差，點知再出馬房同佢跑谷草千八米，呢個路程上季全勇時期跑一次即上名，但基本上呢隻均速馬最佳射程都係一哩，所以上次求突破唔成功，最後只得一席第十二名而回。馬房最後作出修正，今次同「贏得」揀番一哩上陣，當然擺明車馬有決心搏命，而呢隻馬，上季都係跑第三場先至贏，呢次正是季內第三場上陣，計時間及安排工夫，今仗先至係馬匹發揮最佳威力嘅時候。
|
放大圖片
