 放大圖片
呢個禮拜跑三場國際二級賽，屬於下個月跑香港國際賽嘅前哨戰，唔少大馬房都派咗好多實力馬列陣，有啲直情當跑香港國際賽咁準備，呢個又好難怪，因為目前香港嘅國際二級賽獎金都唔少，好似呢三場國際二級賽咁，總獎金高達三百八十萬，頭馬都有成二百萬落袋，贏咗呢場已穩袋兩球，下次跑國際一級賽，贏與唔贏都屬其次，有邊個馬主與練馬師會嫌錢腥，喺咁高獎金場合仲諗住仄馬，留番下次咁白痴。
好似馬會一哩錦標呢場國際二級賽咁，高伯新隻一哩好手「大運財」（圖2號），由今季一開上戰線，呢隻馬就場場鍊，先贏千四米慶典盃，再出跑千六米沙田錦標，只係以頸位之微鬥輸俾前馬王「軍事出擊」得亞軍，所以呢隻「大運財」今次出戰呢場國際二級賽，一樣抱必拚決心，贏完呢仗，再進軍下仗國際一哩錦標，大可整個雙料冠軍返嚟。
高伯新對於催俗馬匹，的確有佢一手，好似呢隻「大運財」咁，每次大賽前部署備戰程序倉主都會非常小心，尤其呢隻中距離佳駟，馬房必定按時按候播放一啲輕音樂俾呢隻馬紓緩情緒。
現時馬房每日均有音樂播放俾隻馬聽，不過，有時未必準時播放，高伯新見此，特別吩咐有關助手，假如一發覺遲開音樂嘅話要立即跟進，一定要隨時安排定一部音樂播放機，定時開音樂俾「大運財」聽，睇倉主對「大運財」準備工夫咁細心，擺到明呢場國際二級賽，佢哋係志在必得。
另一方面，倉主對於「大運財」起居飲食情況亦非常細心，近日每次入馬房，高伯新例必先到「大運財」馬格仄料兜，見到牠食清光所有飼料才放心，從倉主對「大運財」咁緊張動態所見，今次呢隻馬大可作為全日捧場重心。
|
放大圖片
