 放大圖片
近五次騎師王，隔晚大熱門都係雷神，結果贏咗三次，只輸過兩次，難怪近期一見到雷神騎師王有點七至兩倍左右賠率，唔少人都會捧番多少，好過收息，事實上以近五次雷神隔晚騎師王賠率所見，除其中一次佢隔晚列為四倍大熱門輸咗之外，其餘四次，隔晚賠率都被馬會操盤員列佢得一點七至兩倍左右大熱門，賠率雖然偏低，卻是信心十足，結果贏出三次，勝出率達七成半，都唔好話唔好執，以往好多人話騎師王搵笨，今時今日，個個有錢執，口氣都唔同晒。不過，有時雷神嘅演出都咪話唔驚險，好似呢次贏騎師王咁，一開波頭四場攞住個放大鏡都搵佢唔到，到咗第五場走地騎師王賠率，雷神仲一度回到四倍，呢個時候佢先至瞓醒，贏隻六倍「鈦金剛」出嚟，之後又贏「飛霹靂」及「飛來猛」，結果三W封王，雷神躉呢個時候先至飲得杯落。話時話，雷神停賽復出後，贏馬如排山倒海，現時佢經已贏咗55W，今季只係跑咗四個半月，照宜家走勢分分鐘呢季可以贏超過百場頭馬，所以冠軍騎師榮銜一定冇問題，日前呢位巴西籍騎師經已申請埋下半季策騎牌照，預計一定批准，雷神擁躉，唔驚今季偶像走去第二度發展。
今次夜賽，潘頓復出，雷神多番個勁敵，不過咁依然見佢有唔少實力坐騎上陣，唔知操盤手呢次點開盤，不過仍相信雷神會係大熱門，呢次佢其中一隻叫胡馬，來自容廄「醒目名駒」，今次再揀跑一哩，應該可以順利補中。事關上次呢隻馬第一次轉過嚟跑馬地角逐一哩，由羅理雅發揮，全程守喺最後，直路一衝得第四名，其實，呢隻馬本身有速度，前次由薛寶力跑千四米，可以放頭跑，入到直路腳軟才得第六名，呢次換上莫雷拉一試，顯然想用最強配搭拚個明白，呢隻馬有望替莫雷拉再增添頭馬紀錄。
|
放大圖片
