祖兒中山演唱會險傷右腳

放大圖片

■容祖兒孖克勤在中山舉行演唱會。

香港文匯報訊《容祖兒×李克勤世界巡迴演唱會》日前在中山舉行，一票難求之下，本來可以坐一萬二千人的場，竟然入了近二萬觀眾，成為了不法之徒的重點搵錢現場。有人用3Ｄ打印機現場售大量假票，令很多座位都有重複觀眾持飛，又有人聲稱收錢可以帶觀眾進場跟容祖兒、李克勤合照，結果開場後台上有台上唱歌，台下就上演「公安捉賊」，最終用大麻繩拉了一大隊人回公安局。兩位主角對於這些無日無之的騙案，演唱會後表示十分無奈，希望接�茪U來的內地各站巡演，歌迷買飛時一定要在有信譽的機構去買，不要隨便相信人。

祖兒早前因練舞傷了左腳未癒，當晚唱《未知》時又差點弄傷右腳，事後祖兒笑稱：「其實我們兩個對腳都受傷趷趷下，每人有一隻痛腳！ 真係好驚呀，因為太黑，樓梯太多級看不清楚，差點差錯腳，好彩我用盡全力翻身平行，否則右腳一定扭傷仲可能跌落樓梯度，傷埋隻右腳就真係唔知點算...... 」克勤就謂他是自己貪玩的錯，之前有一日回港忍不住去了踢波，應該是用錯力，左腳踢完回家開始腫，現在是腫到上膝頭哥，不過上台後他都會忘了痛楚，照舊全力大跳大唱，不時與祖兒兩人在台上互相扶持，所以腳傷無影響他的演出。