唔少馬房趁住呢個禮拜三冇夜馬跑，都會做一啲私人嘢，唔少華籍馬房就趁呢個時候還神，好似何良咁，周一午間就安排咗個細規模嘅還神儀式，話明係細規模，當然冇馬主份，不過騎師就有三個，黎海榮、梁家俊同埋蘇狄雄，當然，呢三位騎師都經常得到何良支持，阿頭一吹雞還神幾咁唔得閒都要出席，講真，好似黎海榮咁，呢日（周一）普通課期，佢真係好唔得閒，午間一早出現喺何良馬房，並唔係想食燒肉，佢目的只係掛住操隻「超好玩」（圖7號），呢個時候，馬房仲準備咗隻換Q「寶成駿星」一齊拍踱，「超好玩」喺黎海榮胯下踱咗十幾分鐘，亦係兩隻馬表現最搶鏡嘅一駒，谷起馬頸火氣十足，屬人見人愛嘅一駒，難怪黎海榮念念不忘替佢操磨。操畢黎海榮同蘇狄雄先至施施然去洗手，然後等還神儀式開始。睇動態黎海榮雖是應阿頭要求出席拜神，實則最記掛都係隻「超好玩」。
「超好玩」今季跑過四仗，除第一仗跑田草千二米無成績交出外，最近三戰谷草千二米，得兩冠一亞，最近一仗敗於「心花怒放」腳下，馬房決定同隻馬轉跑泥地千二米，當然，泥地戰對「超好玩」嚟講屬第一次上陣，性能係點，冇人可以話到俾大家聽，不過，幕後對「超好玩」寄望甚高，認為泥地性能必無問題，且亦因為跑泥地關係，馬匹可以有時間追趕，對今仗充滿信心。當然，從客觀資料嚟睇，「超好玩」跑泥是有根有據，因為呢隻馬上季曾經試過一課泥地千二米大閘，跑第二後上好勁，贏呢課大閘嘅馬係「友瑩格」，今個月初，呢隻馬又再彈一課泥地千二米，呢課起步即彈出，但鞍上人黎海榮刻意拖到實一實，結果喺五隻試閘馬中得一席第四名，正所謂欲蓋彌章，想話隻馬唔識跑泥地都唔得，收藏實力得太明顯咯，有分頭千祈咪走雞。
