呢個禮拜日，唔少馬房趁住冇馬跑關係，舉行晚宴慰勞一班馬房手足，報答佢哋一季以來所付出嘅努力，好似姚本輝馬房咁，周日就設宴荃灣某酒樓，筵開三席，除馬房員工外，仲有田泰安、寶遜、梁家俊同埋黎海榮四位騎師出席，呢四位仁兄，季內均曾替姚廄出戰，部份更能取得頭馬成績，所以倉主力邀佢哋出席。由於呢一餐係倉主私人掏腰包請客，所以冇請馬主，而為咗方便馬房員工出席荃灣晚宴，六點鐘經已準備旅遊巴喺馬房等候，一倉人啱啱好坐滿出發。
事實上姚本輝今季成績唔錯之餘，跟開佢嗰位公子，即係佢個仔，下季獲派往徐雨石馬房當領班，睇嚟輝哥個乖仔，目前所學嘅嘢經已深受其他馬房認同，而徐雨石收得佢當然是有料到。講番幾位出席姚廄飯局嘅騎師，寶遜係唯一未有替呢個馬房贏馬嘅騎師，佢到目前為止，僅替呢個倉騎過七場馬，最近一場策「踏雪無痕」獲第三名，已經係呢位騎師替姚本輝馬房交得最好成績嘅馬，不過話又咁樣講，呢一批初交到寶遜手上嘅姚敦芋A大部份都係狀態麻麻。好似「雷神」、「永神駒」、「航天勇將」、「樂在其中」、「綠茵風采」及「銀禧繽紛」。真係只得「踏雪無痕」有啲水準外，餘駒季內交俾任何騎師跑，都係冇乜好表現，所以暫時嚟講，寶遜並未受到姚本輝賞識。今次馬房再搵佢騎番隻「綠茵風采」，顯然對佢上場騎呢隻馬嘅表現認同，嗰場隻馬跑一千米直路賽得第五名，論馬匹性能，呢隻馬一定要跑谷草短途先至啱，今次馬房安排隻馬出戰番贏馬路程谷草千二米，經已係最佳嘅出擊時機，何況騎師亦十分重視呢隻馬，周日出荃灣飯局時，先於地堂替隻馬踱步，並與談樹文嘅「天心星」拍踱，賽前仄準馬匹狀態，顯然今場是有搏殺之心，值得吼實。