蘇保羅對班手足講，佢唔會督戰呢個禮拜三夜賽，事關之前一日佢經已返新西蘭，所以餘下兩日賽期，由副練全權執掌大局，不過，臨走之前，都有件唔愉快嘅事發生喺呢個倉，話說早兩日，「錶之勝」被安排到泳池游水，落水後無幾耐，隻馬越游越沉，拖呢隻馬嘅馬伕，以個人力量當然搞唔掂，拖唔返隻馬上岸，最後當然隻馬梗係無得救，不過，呢單嘢都唔係話就咁算數，隻馬要經過驗屍，睇吓有乜問題。雖然蘇保羅唔會喺度督戰，但一樣事前替所有戰馬做好準備工夫，好似呢次交由蔣嘉琦執韁隻「實力飛駒」，周末下午命人安排呢隻馬由蔣嘉琦喺地堂踱步，同一時間，馬房仲安排咗隻「奪目商人」湯智傑，兩隻馬地堂拍踱十幾分鐘，踱畢倉主跟小妹分析馬匹近況，並且詳講一番陣上如何發揮呢隻馬，睇手勢好似叫蔣小妹盡情搶放，唔好留等對手追趕。事實上呢隻「實力飛駒」，過往四場賽事全部由潘頓執韁，每次均用同樣戰術，就係狂放，除頭一仗達到一放到底效果外，其餘三仗，獲兩亞及一第六嘅成績，而獲第六成績嘅一仗，亦是唯一一仗跑沙田短途，另兩場均跑谷草一千米，所以基本上呢隻馬跑谷草一千米短途，係有坐二望一本錢。呢次馬房用蔣嘉琦跑，一來可獲得減七磅優惠，二來呢隻馬擅於領放，蔣嘉琦目前最煞食就係搶閘工夫唔錯，相信「實力飛駒」呢一次交俾蔣嘉琦披甲，實際負一○七磅跑，都咪話唔着數，值得追多次。