■謙仔捧住心形蛋糕出場，蛋糕上更寫住「You are the only one」，令到楊怡大為驚喜。香港文匯報訊（記者 梁靜儀）楊怡與羅仲謙（謙仔）昨日以夫妻檔到尖沙咀出席嫁喜禮餅活動，適逢昨日是楊怡37歲生日，謙仔捧住心形蛋糕出場，蛋糕上更寫住「You are the only one」，令到楊怡大為驚喜，活動上兩人又不時打情罵俏、錫面，蒙着眼的謙仔又從後擁抱太太，十分甜蜜。
活動上楊怡大爆老公拍拖的浪漫舉動，她笑說：「有次萬聖節同埋同事去主題樂園玩，佢book了間房，堆滿幾百個氫氣球，又扮唐老鴨，心諗搞咩？當時好緊張、surprise。」之後兩人又互餵食嫁喜餅及展示有份設計的盾牌餅和禮盒。阿怡解釋用盾牌設計是因為她與謙仔均是藝人，亦經歷很多事情，而盾牌寓意作為大家的後盾，以後順境逆境都一齊行落去。
10月2日擺酒
之後二人一起接受訪問，說到他們在活動上大晒恩愛，是否酬勞很高？謙仔笑說：「我們屋企沒收錢都做。」問到婚宴日期，阿怡透露已定了10月2日，暫定筵開四十多圍，都要開始準備派帖，婚禮都籌備得七七八八，兄弟姊妹團共十八人，包括有吳卓羲、馬國明、王浩信、單立文、唐詩詠、馬賽、康華、張美妮及家姐楊卓娜等。問到謙仔玩新郎環節會否有底線？他說：「唔好搞亂我髮型就得。」楊怡亦稱：「已經同姊妹講，他們個個都係型男靚仔，那日時間比較趕，盡量以開心為主。」至於婚禮主題，謙仔表示他們當日由主題樂園開始，所以會以童話及溫馨為主題。說到他們的婚禮會否有很多贊助？謙仔說：「唔係錢問題，要值得同阿怡開心就OK。」
忙工作未定度蜜月時間
昨日是楊怡的正日生日，問到老公可有送禮物？她甜笑說：「日前已送了一件小飾物畀我，(鑽石？)太有價值的唔需要咁刻意，反而佢28號生日我乜都冇送。」阿謙聞言即肉麻的說：「唔使啦，你已經送了個人畀我啦！」問到晚上會否慶祝？謙仔表示活動後便要返內地為網劇開工，拍到九月底才返港，劇組更搞笑問他可唔可以借他婚禮場地拍一場結婚戲。
至於婚後去哪裡度蜜月？謙仔表示下月中又要再到內地拍電影，要看看時間而定。問到他們如此忙，豈不是無時間造人？阿怡即笑說：「日日都做緊，我係講做一個正常努力工作的人，生小朋友就隨緣。」