姚本輝隻「王者再現」，臨陣落到啡燈演出突然神勇，賽後被小組查詢，輝哥妙答，話隻「王者再現」今次演出令人喜出望外，亦即係講，佢亦估唔到，呢類咁嘅解話答案，都唔係第一次聽過，其實，跑馬嘅嘢有時真係好難完全解釋到，隻馬突然喜歡跑，真係連練馬師都吹佢唔脹，輝哥一向紀錄良好，相信下次「王者再現」應該唔會忽龍忽蟲。先兩日城中話題係新世界創辦人鄭裕彤逝世，呢位老牌馬主，過住亦養過唔少好馬，而佢個仔鄭家純亦喜歡養馬，今次周三就有「大寶庫」及「大寶藏」報名，前駒更係今季一出即勝，呢次因家有白事而雙雙退出。
喺「大寶庫」列陣嗰場五班千八米，即今次夜賽頭場，報名前只列為第一後備嘅「樂在其中」（圖8號），屬姚本輝馬房戰駒，呢次順利獲得正選參賽資格，周日梁家俊經已收到通知，要一早入馬房睇馬，倉主安排咗一個馬房助手，喺地堂踱咗十幾分鐘，騎與練都企喺欄邊細心觀察「樂在其中」，稍後隻馬仲教埋閘。踱步及教閘完畢，倉主亦立刻出柯打，下午與「天心星」齊齊往機坪拍踱，一連串密集式備戰，都顯示出「樂在其中」有晒出擊手影。
「樂在其中」今季第一戰跑田草千四米，明顯唔啱路程，九十九倍馬梁家俊經已一早卜定騎，志在熱身開氣，鞍上人順其自然發揮，跑第十三名輸九個身位，呢場熱身賽後，復課備戰行動升級，馬房安排呢隻馬出戰谷草千八米，呢個路程先至啱隻馬出擊，過去四戰，得一冠一亞成績，而大家咪以為呢類長途馬要好多熱身工夫，查過「樂在其中」前季一出即喺泥地跑得第三名，接著四場更取得兩冠一亞一季成績，所以絕對係一隻可以喺季初搶攻嘅馬，欣逢對手唔算強，加上得到千載難逢嘅補出機會，值得優先考慮捧吓場。