今季贏馬頻率大大降低嘅蔣嘉琦，國慶日贏師父隻「駕善」，並替馬房開齋，稍後呂健威再憑雷神「肥仔」起個孖，全倉上下軍心大振，當然，最開心都係嘉琦妹，上季出道贏得三十七場頭馬，但絕大部分唔係幫師父贏，僅為師父贏得四場。不過，今季明顯唔同，師父開齋馬由佢建功，其實，「肥仔」上次唔爭氣，俾韋達隻「綠勇士」擒咗，宜家都好，一樣能夠幫師父開齋，冇俾雷神捷足先登，所以意義又唔同。蔣嘉琦替師父開齋，心情非常之靚，上周日入馬房，買咗幾打西餅同啲飲品，請晒倉內上下手足，與此同時，小妹又等候師父安排隻「紫電明珠」俾佢睇，原來呢日馬房經已安排「紫電明珠」換馬甲，呂健威要徒弟返嚟睇馬釘甲之餘，仲研究一下隻馬今次如何發揮。今次馬房安排「紫電明珠」跑一哩，今季呢個路程已跑過兩次，兩次陣上走勢仗比仗近，前仗輸五個身位，上仗經已輸近到個幾馬位，其實，經過兩次熱身後，「紫電明珠」狀態有復甦跡象，馬房即刻換上有磅減嘅蔣嘉琦，係有佢道理，呢隻馬最煞食係均速放頭跑，上季由雷神所贏一仗谷草千八米，以頭位贏「喜多屋」，走位2 2 1，之後由蔣嘉琦接手跑，呢位出道未幾見習生，依然仿效雷神跑法，亦用同一戰略，結果由佢騎呢仗，走位1 2 2，得一席亞軍，但呢場屬沙田千六米，所以蔣嘉琦已盡晒力，今次馬房安排番俾佢騎，相信只要交番嗰役水準，又可幫師父贏得頭馬。