呢次夜賽見到唔少練馬師都缺席，因為大部分都去咗紐西蘭拍賣會替旗下馬主揀蟀，好似姚本輝、蘇偉賢、鄭俊偉及文家良等。當中文家良、鄭俊偉及姚本輝都替馬主入到好貨，呢次華籍練馬師都算積極參與，且入貨亦相當踴躍。若講名牌買手，香港離唔開好幾個豪客，例如大摩個仔佐治，經常出重手入好貨，加上細摩返澳洲助陣，所以好嘅貨源唔憂，另一位就係大衛派斯，佢入嘅貨源，亦係品質嘅保證，好似夜賽由羅理雅所贏嗰隻「威風霸皇」，又係佢幫匯豐團體購入，隻馬落到第四班即贏馬，睇嚟仲有排贏，起碼返三班都夠贏。講番呢次日賽不乏由派斯引入嘅好馬，例如「英勇大師」、「詠彩繽紛」及「勝得威」，都係由佢替馬主買返嚟，上述馬全為中上班馬，尤其嗰隻「勝得威」，上場一出即勝，爆出冷門，相信連幕後亦估唔到咁快有戰功，事實上，派斯除幫人買周歲馬叻外，近年幫馬主引入嘅自購馬亦有唔少好嘢，例如剛退役嘅上屆特首盃盟主「豪逸」，今季又同呢個馬主團體購入隻「豪勝」，一出即上名，不過呢隻「勝得威」仲勁，一出即勝，替派斯及告東尼省招牌。通常告東尼養呢類馬都會盡踩，希望能扶搖直上，唔講大家可能會忘記，告東尼以前隻短途王「精英大師」都係出自派斯手，呢隻「勝得威」上場雖然只贏「勇霸神駒」一條頸，但睇贏馬過程，呢次勇熟程度增加，再贏多場千四米應唔難，可望再下一城。