■甄子丹稱身上只得一個真紋身，就是愛妻汪詩詩名字。香港文匯報訊(記者 梁靜儀)甄子丹(Donnie) 昨日為本周四在港上映的新片《3X反恐暴族：重火力回歸》，戲中飾演秘密特工隊首領的甄子丹左手前臂有個「最強」 假紋身，但他拒絕紋上「宇宙最強」四個字，謙稱不要認第一。事實上他身上只得一個真紋身，就是愛妻汪詩詩的名字，冧爆老婆。
子丹指雲迪素除了演出，亦是該片監製之一，二人在戲中有不少對打場面，他說：「最初佢搵我上去佢公司傾，我見到掛住我張相，我就叫佢唔好醜化華人， 之後睇過劇本好滿意，發覺佢非常尊重中國人。」 他表示二人私底下亦是好朋友， 過時過節會互傳短訊和禮物，而對方的小朋友好得意， 經常叫他Uncle Donnie。
戲中子丹不乏上天落海場面， 他大讚外國劇組的安全措施做得不俗，談到最難忘的一場戲？他說： 「在多倫多的跳橋場面，大約有幾層樓高， 我就只靠一條好幼威吔吊住，跳落去咩都冇，會有離心力， 工作人員問我使唔使綵排，我話可以即刻做，於是『仆』 一聲就跳落去，對面有唔少粉絲影住，其實唔危險， 不過我有叫助手拍低成個過程，有咩事都睇到， 當時心諗千祈唔好瀨嘢，唔可以衰畀人睇，我拍完先打畀太太，自己都無怯。」
另外，有傳他將接拍另一套荷里活片《漢蘇奴外傳》，子丹否認說：「 唔係事實，一日未簽約都唔係事實，我有好多唔同計劃， 最緊要係有挑戰。」他又透露農曆年會與家人出埠旅行。