韋達復出四處搵馬騎，剛跑完夜賽佢騎大摩隻「飛龍駒」，隻馬泥地性能突出，加上同場對手唔多，賽前備受睇好，點知三甲不入。其實，呢場馬賽前韋達唔係第一時間搵大摩支持，最初佢搵蔡約翰，事關隻「活力寶」由韋紀力贏完，再出未定主帥，但蔡約翰要等雷神答覆，既然俾人耍咗，於是立刻搵「軍」系馬支持，「軍歌」佢騎開，以為冇問題，但一樣冇得傾，人情冷暖，向大摩搵幫手，終於有隻「飛龍駒」騎，不過，大家可以睇下呢件綵衣，正係「無敵飛龍」一系，雷神仲一早應承騎隻「佳龍駒」跑打吡，所以呢隻「飛龍駒」俾得韋達騎，點會係好嘢。結果雷神隻「華美之友」跑到氣管有血大敗，咁當然韋達隻「飛龍駒」亦都冇影，所以有時揀馬落注，真係寧買當頭起。「活力寶」蔡神話等雷神答覆，到頭來配上得力冷殺手田泰安，由此可見要搏殺時，一定搵番自己信得過人馬。今次日賽最矚目當然係嗰場經典一哩賽，大摩出七隻，雷神騎邊隻，當然係「佳龍駒」，當然大家注意力未必完全放喺呢隻馬身上，因為同場仲有「美麗傳承」、「鷹雄」，甚至乎莫雅騎嘅「西方快車」，但呢幾隻馬，都離唔開與雷神有關。「西方快車」暫時未夠分搶到打吡入場券，不過，只要呢場跑到前三名，入圍資格就冇問題，其餘三隻大摩馬肯定已有跑打吡資格，咁樣邊個想贏呢場錦標，睇動態一定係雷神隻「佳龍駒」。事關隻馬到目前為止最叻跑千四及千六米路程，假如殺到跑打吡，要佢跑二千米，突然間跳程跑多四百米，真係好難適應，何況大摩今季所入一批質新馬，隻隻身價都瞄住跑打吡而來，咁「佳龍駒」最好嘅交代方式，就係贏咗呢仗經典一哩賽，以後乜錦標，相信大摩會安排由其他馬輪住威，大家話合唔合理。